કમ્પ્યુટર હાર્ડવેર માર્કેટમાં છેલ્લાં કેટલાક સમયથી પ્રોસેસિંગ ચિપ, ગ્રાફિક્સ કાર્ડ (GPU) સહિતની એસેસરીઝનો સપ્લાય ખોરવાતાં ભાવમાં 30 ટકા સુધીનો ઉછાળો જોવા મળ્યો છે.
સુરતની આઈટી માર્કેટમાં કમ્પ્યુટર અને લેપટોપમાં વપરાતી પ્રોસેસર ચિપ તેમજ હાઈ-એન્ડ ગ્રાફિક્સ કાર્ડના ભાવમાં સીધો 30 ટકા સુધીનો વધારો થઈ ગયો છે. બીજી તરફ, માર્કેટમાં માંગ સામે સપ્લાય ખૂબ જ ઓછો હોવાથી વેપારીઓ ગ્રાહકોના ઓર્ડર પૂરા કરી શકતા નથી.
ગ્લોબલ માર્કેટમાં સિલિકોનની અછત, ઈમ્પોર્ટ કસ્ટમ્સ ડ્યુટીમાં ફેરફાર અને આર્ટિફિશિયલ ઈન્ટેલિજન્સ તથા ડેટા સેન્ટર્સમાં હાઈ-એન્ડ ગ્રાફિક્સ કાર્ડની તીવ્ર માંગના કારણે સ્થાનિક રિટેઈલ બજારમાં ડિમાન્ડ અને સપ્લાય વચ્ચે મોટો ગેપ સર્જાઈ ગયો છે.
આંતરરાષ્ટ્રીય માર્કેટમાં ચિપ અને ગ્રાફિક્સ કાર્ડ બનાવતી ગણતરીની જ કંપનીઓ છે. ગ્લોબલ લેવલે AI અને ડેટા પ્રોસેસિંગમાં ગ્રાફિક્સ કાર્ડનો વપરાશ વધતાં ભારતમાં સ્થાનિક સપ્લાય ઘટ્યો છે. સપ્લાય શોર્ટ હોવાને કારણે ભાવમાં 30% સુધીનો વધારો થયો છે. આગામી સમયમાં સપ્લાય સરળ નહીં થાય તો માર્કેટ પર વધુ અસર જોવા મળશે.
