શિહોરના ગુંદાળા વિસ્તારમાં દારૂની બાતમી આપ્યા વહેમે મજૂરનું અપહરણ કરી મારમાર્યો

ભાવનગર જિલ્લાના શિહોર શહેરના ગુંદાળા વિસ્તારમાં દારૂની બાતમી આપ્યાના ખોટા વહેમ રાખીને એક મજૂર યુવાનનું અપહરણ કરી તેના પર પાંચથી છ શખ્સો દ્વારા ઘાતક હુમલો કરી ધોકા અને પટ્ટા વડે મારમારી નગ્ન કરવાની ધમકી આપ્યાની ફરિયાદ નોંધાવતા સિહોર પોલીસે ગુનો નોંધી તપાસ હાથ ધરી છે.
બનાવ અંગે પ્રાપ્ત વિગતો મુજબ શિહોરના રામનગર ગુંદાળા વિસ્તારમાં રહેતા ૩૫ વર્ષીય વિપુલભાઈ ધનજીભાઈ સોલંકી ગત તા.૪ના રોજ સાંજના સમયે પોતાના ઘર બહાર બજારમાં ઊભા હતા. તે દરમિયાન આકાશ ઉર્ફે મટકી રમેશભાઈ રાઠોડ અને હિતેશભાઈ ઉર્ફે બાદશાહ મહેશભાઈ મકવાણા એક્ટિવા મોટરસાયકલ લઈને આવ્યા હતા. તેમણે આકાશના ભાઈ વિનોદભાઈ ઉપર શિહોર પોલીસે ઈંગ્લિશ દારૂનો કેસ કર્યો છે અને આ બાતમી વિપુલભાઈએ આપી છે તેમ કહી ગાળો આપી હતી. ત્યારબાદ સંજય ઉર્ફે ટકુ અને જીગર ઉર્ફે જીગો પણ ત્યાં આવી પહોંચ્યા હતા.
આ ચારેય શખ્સોએ વિપુલભાઈને બળજબરીપૂર્વક એક્ટિવા પર બેસાડીને ખાખરીયા ગામના પાટિયા પાસેના ખુલ્લા પ્લોટમાં અપહરણ કરીને લઈ ગયા હતા. ત્યાં રસ્તામાં મેહુલભાઈ ઉર્ફે ગોદડ અને માનસિંહ હાલાજીભાઈ રાઠોડ પણ જોડાઈ ગયા હતા. આ તમામ છ શખ્સોએ મળીને વિપુલભાઈને લાકડાના ધોકા અને કમરના પટ્ટા વડે વાંસાના ભાગે તથા શરીરે આડેધડ ઢોર માર માર્યો હતો. આરોપી આકાશએ દારૂના કેસમાં થયેલ એક લાખ રૂપિયાનું નુકસાન ભરપાઈ કરવા દબાણ કર્યું હતું અને ન આપવા પર જાનથી મારી નાખવાની ધમકી આપી હતી. એટલું જ નહીં, યુવાનના ભત્રીજાના ફોન પર ફોન કરાવીને પણ રૂપિયા લઈને બોલાવવાની ધમકી આપી હતી અને ગુંદાળા વિસ્તારમાં કપડા કાઢી નગ્ન કરી મારવાની ધમકી આપી હતી.
બાદમાં ભોગ બનનાર યુવાનને ગુંદાળા ઢાળ પાસે છોડી મૂકવામાં આવ્યા હતા. શરીરે ગંભીર ઈજાઓ હોવાથી વિપુલભાઈને શિહોર સરકારી હોસ્પિટલ અને ત્યારબાદ ભાવનગર સરકારી હોસ્પિટલ ખાતે સારવાર અર્થે ખસેડવામાં આવ્યા હતા. આ બનાવ અંગે ફરિયાદ નોંધાવતા શિહોર પોલીસે તમામ 6 શખ્સો સામે બી.એન.એસ કલમ ૧૪૦(૨), ૧૧૫(૨), ૩૫૨, ૩૫૧(૩), ૬૧(૨) તથા જી.પી. એક્ટ ૧૩૫ મુજબ ગુનો નોંધી આરોપીઓને ઝડપી પાડવાની કવાયત હાથ ધરી છે.