આફ્રિકી દેશ કેન્યાના પ્રખ્યાત સામ્બુરુ કાઉન્ટી વિસ્તારમાં એક સફારી હેલિકોપ્ટર ક્રેશ થયું હોવાનું પ્રકાશમાં આવ્યું છે. આ ભયાનક અકસ્માતમાં હેલિકોપ્ટરમાં સવાર તમામ 7 લોકોના ઘટનાસ્થળે જ કરૂણ મોત નીપજ્યા છે. મૃતકોમાં ઈક્વાડોરની ગુપ્તચર એજન્સીના વડા મિશેલ સેન્સી-કોન્ટુગી, તેમની પત્ની પણ સામેલ હોવાનું સૂત્રોએ જણાવ્યું છે. આ સાથે આ દર્ઘટનામાં અન્ય 5 અમેરિકન નાગરિકોના પણ મોત થયાં છે.
મીડિયા રિપોર્ટ્સ પ્રમાણે હેલિકોપ્ટર લોઈસાબા વાઈલ્ડલાઈફ રિઝર્વમાંથી ઉડાન ભરીને પ્રવાસીઓને લઈ જઈ રહ્યું હતું. સવારે આશરે 9:13 વાગ્યે અચાનક ટેકનિકલ ખામી સર્જાતા હેલિકોપ્ટર નીચે ખાબક્યું હતું અને જમીન સાથે અથડાતા જ તેમાં ભીષણ આગ લાગી ગઈ હતી. ધડાકા સાથે હેલિકોપ્ટરના ટુકડા-ટુકડા થઈ ગયા હતા.
કેન્યા સિવિલ એવિએશન ઓથોરિટી દ્વારા આ દુર્ઘટનાની પુષ્ટિ કરવામાં આવી છે. અકસ્માત સર્જાયો તે વિસ્તાર અત્યંત દુર્ગમ અને પહાડી હોવાને કારણે, તેમજ ખરાબ હવામાન અને અંધારાને લીધે રાહત અને બચાવ કામગીરીમાં ભારે વિલંબ થયો હતો. મીડિયા રિપોર્ટસ્ પ્રમાણે મૃતકોમાં ફ્લોરિડાના સીનિયર મેનેજર જોસ આલ્બર્ટો સુઆરેઝ સહિત પાંચ અમેરિકી સામેલ છે.
સોશિયલ મીડિયા પર શેર કરાયેલી તસવીરોમાં સળગતો મલબો અને ભયાનક દ્રશ્યો જોઈ શકાય છે. ઈક્વાડોરના પરિવહન મંત્રી રોબર્ટો લુકે પોતાના દેશના ગુપ્તચર વડા અને તેમની પત્નીના આકસ્મિક અવસાન પર ઊંડો શોક વ્યક્ત કર્યો છે. આ સાથે એરક્રાફ્ટ અકસ્માત તપાસ વિભાગ (AAID) ના ડાયરેક્ટર ફ્રેડરિક કાબુંગેએ ઘટનાના કારણો જાણવા માટે ઉચ્ચ સ્તરીય તપાસના આદેશ આપ્યા છે. આખરે કેવી રીતે આ હેલિકોપ્ટર ક્રેશ થયું તેની તપાસ શરૂ કરવામાં માટે AAID ના ડાયરેક્ટર દ્વારા આદેશ આપી દેવામાં આવ્યો છે.
