ઈરાનની પાકિસ્તાન-તૂર્કિયેને ધમકી, સાઉદીનો સાથ આપ્યો ખેર નથી

સાઉદી અરેબિયા પર હૂથી બળવાખોરોના સતત વધી રહેલા હુમલા વચ્ચે ઈરાને હવે અબુ ધાબી સહિત પ્રદેશના દેશો અને મક્કા સંરક્ષણ કરારમાં સામેલ સાઉદી અરેબિયા, પાકિસ્તાન તેમજ તૂર્કિયે પ્રત્યે આકરૂ વલણ અપનાવ્યું છે. 5 ઓક્ટોબરથી અમલમાં આવેલા ‘મક્કા સંરક્ષણ કરાર’ મુજબ, કોઈ એક દેશ પર થતો હુમલો એ કરારમાં સામેલ તમામ દેશો પરનો હુમલો ગણાશે. આ સ્થિતિમાં સાઉદીની મદદ માટે પાકિસ્તાન અને તૂર્કિયે જવાબી કાર્યવાહી કરી શકે છે. જોકે, ઈરાને સ્પષ્ટ ચેતવણી આપી છે કે યમનમાં કોઈપણ પ્રકારની દખલગીરીના પરિણામો અત્યંત જોખમી અને અપ્રત્યાશિત આવી શકે છે.
પાકિસ્તાન દ્વારા સાઉદી અરેબિયામાં હજારો સૈનિકો મોકલવાની ચર્ચા પર ઈરાનના વિદેશ મંત્રાલયના પ્રવક્તા ઇસ્માઇલ બઘાઈએ જણાવ્યું કે, અમે આવી અફવાઓ સાંભળી છે અને આશા રાખીએ છીએ કે તે સાચી ન હોય. યમન મામલે આ કરારનો ઉપયોગ કરવો ભારે પડી શકે છે. બીજી તરફ, ઈરાની વિદેશ મંત્રી અબ્બાસ અરાઘચી અને સંસદીય સમિતિના સભ્ય ઇબ્રાહિમ રેજાઈએ કહ્યું કે, ‘આ પ્રકારના કરારો ઈરાનને રોકી શકશે નહીં. સાઉદી અરેબિયાને તૂર્કિયે કે પાકિસ્તાન પણ સુરક્ષા પૂરી પાડી શકશે નહીં, જેમ અમેરિકા પણ આપી શક્યું નથી. તેથી સાઉદીએ પોતાની નીતિઓ બદલવી જોઈએ.’ઈરાને સંયુક્ત રાષ્ટ્ર સભામાં સાત શરતો સાથેનો શાંતિ પ્રસ્તાવ મૂક્યો હતો અને તે સ્વીકારાય તો સાત દિવસમાં હોર્મુઝ સ્ટ્રેટ ખોલવાની ખાતરી આપી હતી. પરંતુ ઈરાનની સુપ્રીમ નેશનલ સિક્યુરિટી કાઉન્સિલના સચિવ મોહસિન રેજાઈના જણાવ્યા મુજબ, અમેરિકાનો જવાબ અસ્પષ્ટ હોવાથી ઈરાને તેને ફગાવી દીધો છે.