ભારતના આઝાદીના ઘડવૈયા અને દેશને અખંડિતતાના સૂત્રમાં પરોવનાર લોહપુરુષ ભારત રત્ન સરદાર વલ્લભભાઈ પટેલની જન્મજયંતી નિમિત્તે સમગ્ર દેશમાં ભારે ઉત્સાહ સાથે ઉજવણી કરવામાં આવી રહી છે. આ ખાસ પ્રસંગે સંસ્કારી નગરી વડોદરાના ઐતિહાસિક નવલખી ગ્રાઉન્ડ ખાતે રાષ્ટ્રીય એકતા દિવસ-2026 તેમજ રન ફોર યુનિટી કાર્યક્રમનું આયોજન કરાયું હતું. આ ઉજવણીમાં સમગ્ર વડોદરા શહેર દેશભક્તિ, ઉત્સાહ અને રાષ્ટ્રભાવનાના રંગે રંગાયેલું જોવા મળ્યું હતું.
આ રાષ્ટ્રીય પર્વની ઉજવણી ગુજરાતના માનનીય મુખ્યમંત્રી ભૂપેન્દ્ર પટેલની ઉપસ્થિતિમાં સંપન્ન થઈ હતી. નવલખી ગ્રાઉન્ડ ખાતે પધારેલા મુખ્યમંત્રીનું વડોદરા પોલીસ બેન્ડની સુરાવલીઓ વચ્ચે આદરપૂર્વક ગાર્ડ ઓફ ઓનર આપીને ભવ્ય સ્વાગત કરાયું હતું. ત્યારબાદ મુખ્યમંત્રીએ ભારત રત્ન સરદાર વલ્લભભાઈ પટેલની પ્રતિમાને પુષ્પાંજલિ અર્પણ કરી તેમના અમર પ્રદાનને શ્રદ્ધાસુમન અર્પિત કર્યા હતા. પુષ્પાંજલિ બાદ સમગ્ર ગ્રાઉન્ડ ખાતે ઉપસ્થિત સભ્યો દ્વારા રાષ્ટ્રગાન કરવામાં આવ્યું હતું. રાષ્ટ્રગાનના સમાપન બાદ વડોદરા શહેરના પોલીસ કમિશનર નરસિમ્હા કોમારે ઉપસ્થિત તમામ નાગરિકો, અધિકારીઓ અને યુવાનોને દેશની એકતા, અખંડિતતા અને સુરક્ષા જાળવી રાખવાના દ્રઢ સંકલ્પ સાથે રાષ્ટ્રીય એકતાના શપથ લેવડાવ્યા હતા.
ત્યારબાદ મુખ્યમંત્રી ભૂપેન્દ્ર પટેલના વરદ હસ્તે લીલી ઝંડી બતાવીને રન ફોર યુનિટી દોડનું પ્રસ્થાન કરાવવામાં આવ્યું હતું. આ કાર્યક્રમની સૌથી મોટી અને પ્રેરણાદાયી વિશેષતા એ રહી કે મુખ્યમંત્રીએ માત્ર દોડને પ્રસ્થાન કરાવીને વિરામ ન લીધો, પરંતુ તેઓ પોતે પણ અત્યંત ઉત્સાહભેર આ દોડમાં જોડાયા હતા. મુખ્યમંત્રીની નાગરિકો વચ્ચે ઉપસ્થિતિ અને તેમની સક્રિય ભાગીદારીએ દોડમાં ભાગ લઈ રહેલા યુવાનો અને નાગરિકોમાં અદ્ભુત ઊર્જા, જોશ અને નવો ઉત્સાહ ભરી દીધો હતો.
