વિશ્વની વસ્તી તેના રેકોર્ડ સ્તરે પહોંચી જવાના આરે છે. સંયુક્ત રાષ્ટ્રના રિપોર્ટમાં દાવો કરવામાં આવ્યો છે કે મંગળવારે વિશ્વની વસ્તી આઠ અબજ સુધી પહોંચી જશે .ધરતી પર 2030 સુધી વસ્તીનો આ આંકડો વધીને 850 કરોડ, 2050 થી 970 કરોડ અને 2100 થી 1040 કરોડ થવાનો અંદાજ છે. યુએનના રિપોર્ટમાં માનવીની સરેરાશ ઉંમર વિશે દાવો કરવામાં આવ્યો છે કે હાલમાં તે 72.8 વર્ષ છે, જે 1990ની સરખામણીમાં 2019 સુધી નવ વર્ષનો વધારો થયો છે.
ઉલ્લેખનીય છે કે 2050 સુધીમાં માનવીની સરેરાશ ઉંમર 77.2 વર્ષ સુધી પહોંચવાનો અંદાજ છે. રિપોર્ટમાં કહેવામાં આવ્યું છે કે મહિલાઓ પુરૂષો કરતા સરેરાશ 5.4 વર્ષ વધુ જીવે છે. મહિલાઓની સરેરાશ ઉંમર 73.4 વર્ષ અને પુરુષોની સરેરાશ ઉંમર 68.4 વર્ષ હોવાનો અંદાજ છે. યુનાઈટેડ નેશન્સ દ્વારા બહાર પાડવામાં આવેલ આ વાર્ષિક વર્લ્ડ પોપ્યુલેશન પ્રોસ્પેક્ટ્સ રિપોર્ટમાં એ પણ જણાવવામાં આવ્યું છે કે વૈશ્વિક વસ્તી 1950 પછી સૌથી ધીમી ગતિએ વધી રહી છે, જે 2020માં ઘટીને એક ટકાથી પણ ઓછી થઈ ગઈ છે. રિપોર્ટ અનુસાર, વૈશ્વિક વસ્તી 7 થી વધીને 8 અબજ થવામાં 12 વર્ષ લાગ્યા છે, જ્યારે 2037 સુધીમાં તે 9 અબજ સુધી પહોંચી જશે.
વસ્તી વૃદ્ધિના સંદર્ભમાં, ભારત આ વર્ષે ચીનને પછાડીને વિશ્વનો સૌથી વધુ વસ્તી ધરાવતો દેશ બની જશે. રિપોર્ટમાં દાવો કરવામાં આવ્યો છે કે વર્ષ 2023 સુધીમાં ભારત ચીનને પછાડીને સૌથી વધુ વસ્તી ધરાવતો દેશ બની જશે. તે જ સમયે, રિપોર્ટમાં વિશ્વની વસ્તી 2080 ની આસપાસ 1040 કરોડ સુધી પહોંચવાનો અંદાજ છે.
વાર્ષિક વર્લ્ડ પોપ્યુલેશન પ્રોસ્પેક્ટ રિપોર્ટમાં દાવો કરવામાં આવ્યો છે કે આગામી 27 વર્ષમાં વિશ્વની અડધી વસ્તી 8 દેશોમાં રહેતી હશે. મતલબ કે આ આઠ દેશોની વસ્તી વિશ્વના અન્ય દેશોની સરખામણીમાં સૌથી વધુ હશે. રિપોર્ટમાં કહેવામાં આવ્યું છે કે 2050 સુધીમાં ભારત, પાકિસ્તાન, કોંગો, ઇજિપ્ત, ઇથોપિયા, નાઇજીરિયા, ફિલિપાઇન્સ અને તાન્ઝાનિયામાં વિશ્વની 50 ટકા વસ્તી હશે. આનો અર્થ એ થયો કે આ આઠ દેશો આગામી કેટલાક વર્ષોમાં સૌથી વધુ વસ્તી ગીચતા ધરાવનાર છે.
