જુનિયર ક્લાર્કની પરીક્ષાનો પેપર ફૂટ્યા બાદ પરીક્ષા રદ કરવામાં આવતા સરકારની નિષફળતા અને પેપર લીક કરનાર કૌભાંડીઓના પાપે ઝેરી દવા પી ગયેલ હાથબ ગામની યુવતીનું સારવાર દરમિયાન મોત નીપજ્યું હતું.
ઘોઘા તાલુકાના હાથબ ગામમાં રહેતી પાયલબેન કરશનભાઈ બારૈયા (ઉ.વ.૨૧) નામની યુવતીએ સરકારી નોકરી મેળવવા માટે ગત તા. ૩૦મી જાન્યુઆરીએ યોજાનારી પંચાયત સેવાની જુનિયર ક્લાર્કની લેખિત પરીક્ષા માટે તૈયારી કરી હતી. પરીક્ષાની આગલી રાત્રે જ પેપર લીક કૌભાંડ પ્રકાશમાં આવતા છેલ્લી ઘડીએ પરીક્ષાના દિવસે સવારે પરીક્ષા રદ્દ કરવામાં આવતા આ પરીક્ષાની તૈયારી કરનાર લાખો ઉમેદવારો નિરાશ થયા હતા.
પરીક્ષા કેન્સલ થતાં પાયલબેન બારૈયા માનસિક રીતે પડી ભાંગ્યા હતા અને ગત તા.૩૦-૧ના રોજ સાંજના પાંચ કલાકના અરસામાં તેણીએ પોતાના ઘરે જાતેથી ઝેરી દવા પી લઈ આત્મહત્યાનો પ્રયાસ કરતા તેમને સારવાર અર્થે ભાવનગરની ખાનગી હોસ્પિટલ અને ત્યાર બાદ સર ટી.હોસ્પિટલ ખસેડવામાં આવ્યા હતા, જ્યાં તેમનું લાંબી સારવાર બાદ ૧૩ રવિવારે મૃત્યુ થયું હતું. આ બનાવ સંદર્ભે હોસ્પિટલ પોલીસે જરૂરી કેસ કાગળો તૈયાર કરી સબંધિત પોલીસને મોકલી આપવા તજવીજ હાથ ધરી હતી.
