પશ્ચિમ બંગાળ, બિહાર અને આંધ્રપ્રદેશમાં ઊંચા તાપમાન માટે ઓરેન્જ એલર્ટ જાહેર

તાપમાન 45 ડિગ્રી સુધી વધવાથી, શાળાઓ અને કોલેજો બંધ કરવા અથવા ઉનાળાની માર્ગદર્શિકા મુજબ ચલાવવાની સલાહ આપવામાં આવી છે. હવામાન વિભાગે પશ્ચિમ બંગાળ, બિહાર અને આંધ્રપ્રદેશમાં ઊંચા તાપમાન માટે ઓરેન્જ એલર્ટ જાહેર કર્યું છે.હવામાન વિભાગના જણાવ્યા અનુસાર સિક્કિમ, ઝારખંડ, ઓડિશા અને ઉત્તર પ્રદેશમાં હીટવેવની સ્થિતિ સર્જાઈ શકે છે.
દિલ્હી સરકારે શાળાઓ માટે એડવાઈઝરી જાહેર કરી છે. સત્તાવાર માર્ગદર્શિકા મુજબ, રાષ્ટ્રીય રાજધાનીમાં શાળાઓ બપોરના સમયે કોઈ કાર્યક્રમનું આયોજન કરશે નહીં. દિલ્હી સરકાર દ્વારા જાહેર કરાયેલા એક પરિપત્રમાં જણાવાયું છે કે, “ઉનાળાની ઋતુમાં દિલ્હીમાં દિવસનું તાપમાન 40 ડિગ્રી સેલ્સિયસથી વધુને વટાવી જાય છે, તે શાળાઓમાં અભ્યાસ કરતા બાળકો અને કિશોરોના સ્વાસ્થ્ય માટે હાનિકારક છે. એનસીઆરમાં તાપમાનમાં વધારો થયો છે. ગરમી સંબંધિત બીમારી કેસ વધી રહ્યા છે.”
હીટવેવના કારણે પશ્ચિમ બંગાળની શાળાઓ 24 એપ્રિલ સુધી બંધ છે. શાળા શિક્ષણ વિભાગ અને ઉચ્ચ શિક્ષણ વિભાગે તમામ રાજ્ય સંચાલિત તેમજ ખાનગી શાળાઓ બંધ કરવાનો આદેશ આપ્યો છે. જો કે, સત્તાવાર આદેશ પશ્ચિમ બંગાળમાં દાર્જિલિંગ અને કાલિમપોંગ સિવાયના તમામ પ્રદેશો માટે માન્ય છે કારણ કે આ પર્વતીય વિસ્તારો છે.
ત્રિપુરાના મુખ્યમંત્રી માણિક સાહાએ સોમવારે જાહેરાત કરી હતી કે રાજ્યની તમામ સરકારી શાળાઓ 18 થી 23 એપ્રિલ સુધીના એક સપ્તાહ માટે બંધ રહેશે. પટના જિલ્લા પ્રશાસને શનિવારથી શાળાઓના સમયમાં ફેરફાર કર્યો છે. પટનાના જિલ્લા મેજિસ્ટ્રેટ ડૉ. ચંદ્રશેખર સિંહે આ સંબંધમાં એક નોટિફિકેશન બહાર પાડ્યું હતું અને તમામ સ્કૂલોને સવારે 6.30 થી 11.30 સુધીના સમયમાં ફેરફાર કરવા જણાવ્યું હતું, અગાઉ જિલ્લાની દરેક સ્કૂલનો સમય સવારે 7 થી 1 વાગ્યાનો હતો.