એસિડિટી વગેરે દૂર કરવા માટે વપરાતી કેટલીક દવાઓ કેન્સરનું જોખમ નોંતરી શકતી હોવાની રજૂઆત સાથે હાઇકોર્ટ સમક્ષ વધુ એક જાહેરહિતની અરજી કરવામાં આવી છે. ગ્રીન રંગની ગોળીઓની સ્ટ્રીપ ખોલતાં અંદરથી કથ્થઈ રંગનું ભેળસેળ યુક્ત પદાર્થ નીકળતું હોવાનું હાઇકોર્ટને એડવોકેટ દ્વારા ખૂલ્લી કોર્ટમાં બતાવવામાં આવ્યું હતું. તે સિવાય કેટલાક ઇન્જેક્શન્સ જે લિક્વિડ સાથે મિક્સ કરતાં જુદાજુદા રંગો બદલે છે તે પણ કોર્ટને બતાવ્યું હતું. આ જોઇને એક્ટિંગ ચીફ જસ્ટિસ એ.જે.દેસાઇ અને જસ્ટિસ બિરેન વૈષ્ણવની ખંડપીઠ પણ ચોંકી ઊઠી હતી અને સમગ્ર મામલે ફાર્મા કંપની સહિતના પ્રતિવાદીઓને નોટિસ પાઠવી કેસની વધુ સુનાવણી જૂનમાં મુકરર કરી છે.
આવા જ મુદ્દે અગાઉ પણ એક જાહેરહિતની અરજી દાખલ કરવામાં આવી છે અને એમાં હાઇકોર્ટે રિટ જે આધારે કરવામાં આવી છે એ સેન્ટ્રલ ડ્રગ્સ કંટ્રોલ સ્ટાન્ડર્ડ ઓર્ગેનાઇઝેશનનો રિપોર્ટ રેકર્ડ પર મૂકવા હાઇકોર્ટે કહ્યું હતું. જોકે આ નવી જાહેરહિતની અરજીમાં અરજદાર દ્વારા આ રેકર્ડ સાથે તમામ વિગતો કોર્ટ સમક્ષ રજૂ કરવામાં આવી હતી અને એવી દલીલ કરવામાં આવી હતી કે કેટલીક જીવન રક્ષક દવાઓ તેના ધારાધોરણ માટેના ટેસ્ટમાં નિષ્ફળ રહી હોવા છતાંય માર્કેટમાં તેનું કરોડો રૂપિયાનું વેચાણ છે.
અરજદારે એસિડિટી માટેની એક જ દવાનો 400 કરોડ રૂપિયાનો ધંધો હોવાનો દાવો કર્યો હતો. અરજદારે કોર્ટ સમક્ષ રજૂઆત કરવાની સાથે એક દવાની સ્ટ્રીપને ખોલીને દવાઓ કાઢી હતી અને જજને આપી હતી. હતો કે આ લીલા રંગની દવામાં કથ્થઇ રંગનું શું છે? ત્યારે એડવોકેટે કહ્યું હતું કે, આ કેન્સરને નોંતરતું જોખમી પદાર્થ છે. અરજદાર તરફથી એડવોકેટે દલીલ કરી હતી કે,‘આ દવા વિશ્વના અન્ય દેશોમાં પ્રતિબંધિત છે. ભારતના હવામાનમાં આ દવા જ્યારે ફોઇલમાં પેક કરવામાં આવે છે, ત્યારે તે સમય હીટની મદદ લેવામાં આવે છે. જે હીટના લીધે દવા સાથે અન્ય તત્ત્વો પેદા થઇ જાય છે અને એ કેન્સર નોંતરતા જોખમી તત્ત્વ-એનડીએમએને જન્મ આપતાં હોય છે.
ત્યારબાદ હાઇકોર્ટે કેટલી કંપનીઓની દવાઓનો મુદ્દો હોવાની પૃચ્છા કરતાં અરજદારે બે કંપનીઓનું નામ લીધું હતું. તેથી હાઇકોર્ટે રિટ તરીકે જોડવા અરજદારને કહ્યું હતું. બીજી તરફ અરજદાર દ્વારા એક વધારાનું સોગંદનામું કરીને નબળી ગુણવત્તા વાળી જોખમી દવાઓની યાદી પણ હાઇકોર્ટ સમક્ષ મૂકી હતી. ઉક્ત તમામ રજૂઆત અને મુદ્દાને ધ્યાને લઇ હાઇકોર્ટે તમામ પક્ષકારોને નોટિસ પાઠવી છે.
