નાણાકીય વર્ષ 2022-23 દરમિયાન ચીનથી લેપટોપ, પર્સનલ કોમ્પ્યુટર, ઈન્ટિગ્રેટેડ સર્કિટ અને સોલાર સેલ જેવા ઈલેક્ટ્રોનિક સામાનની આયાતમાં ઘટાડો થયો છે. ઈકોનોમિક થિંક ટેન્ક જીટીઆરઆઈએ પોતાના એક રિપોર્ટમાં આ અંગેની જાણકારી આપી છે. ગ્લોબલ ટ્રેડ રિસર્ચ ઇનિશિયેટિવ (જીટીઆરઆઈ) એ જણાવ્યું હતું કે ઈલેક્ટ્રોનિક ચીજવસ્તુઓની આયાતમાં ઘટાડો એવા ક્ષેત્રોમાં ઉલ્લેખનીય છે કે જ્યાં પીએલઆઈ (પ્રોડક્શન લિંક્ડ ઈન્સેન્ટિવ) યોજનાઓ રજૂ કરવામાં આવી છે.
ઈકોનોમિક થિંક ટેન્ક જીટીઆરઆઈના આ અહેવાલ મુજબ, તબીબી ઉપકરણોની આયાત ગત નાણાકીય વર્ષમાં વાર્ષિક ધોરણે 13.6 ટકા ઘટીને 2.2 અબજ ડોલર રહી ગઈ છે. આ સિવાય સોલાર સેલની આયાતમાં 70.9 ટકાનો ઘટાડો થયો છે. આ રિપોર્ટમાં કહેવામાં આવ્યું છે કે સમીક્ષા હેઠળના સમયગાળા દરમિયાન લેપટોપ, પર્સનલ કોમ્પ્યુટર (પીસી) ની આયાતમાં 23.1 ટકા અને મોબાઈલ ફોનની આયાતમાં 4.1 ટકાનો ઘટાડો થયો છે.
દરમિયાન, અન્ય એક અહેવાલમાં કહેવામાં આવ્યું છે કે એપ્રિલમાં ચીનમાં આર્થિક ગતિવિધિઓમાં સુસ્તી જોવા મળી હતી. તેની અસર રોજગારીની તકો પર પણ પડી હતી. મંગળવારે જાહેર કરાયેલા સત્તાવાર ડેટા અનુસાર, ડિસેમ્બરમાં કોવિડ પ્રતિબંધો હટાવ્યા પછી છૂટક વેચાણ તો વધ્યું હતું, પરંતુ આગાહી કરતાં ઓછું છે.
