કેન્દ્રીય તપાસ એજન્સી EDએ રિયલ એસ્ટેટ ડેવલપર સુપરટેકના ચેરમેન આરકે અરોરાની ધરપકડ કરી છે. સૂત્રોએ જણાવ્યું કે આરકે અરોરાની પીએમએલએ હેઠળ ધરપકડ કરવામાં આવી છે. મંગળવારે EDએ આરકે અરોરાને સમન્સ જારી કરીને પૂછપરછ માટે બોલાવ્યા હતા. દિલ્હી, હરિયાણા અને ઉત્તર પ્રદેશના અલગ-અલગ પોલીસ સ્ટેશનોમાં સુપરટેક ઑફ કંપનીઝ અને તેના ડિરેક્ટરો વિરુદ્ધ ખરીદદારો સાથે છેતરપિંડીના કેસ નોંધાયેલા છે.
તપાસમાં સામે આવ્યું કે ફ્લેટના નામે ખરીદદારો પાસેથી મોટી રકમ લેવામાં આવી હતી. તેમને સમયસર પઝેશન આપવામાં આવ્યું ન હતું, તેમજ પ્રોજેક્ટના નામે બેંકો પાસેથી લીધેલી લોનનો પણ નિયમો વિરુદ્ધ ઉપયોગ કરવામાં આવ્યો હતો. આજે પૂછપરછમાં EDને સંતોષ ન થતાં આરકે અરોરાની ધરપકડ કરવામાં આવી હતી. અરોરાને બુધવારે સ્પેશિયલ કોર્ટમાં રજૂ કરવામાં આવે તેવી શક્યતા છે.
આરકે અરોરા બિલ્ડરોની સંસ્થા નેશનલ રિયલ એસ્ટેટ ડેવલપમેન્ટ કાઉન્સિલના અધ્યક્ષ પણ છે. એન્ફોર્સમેન્ટ ડિરેક્ટોરેટે કહ્યું હતું કે એપ્રિલમાં સુપરટેક અને તેના ડિરેક્ટર્સની 40 કરોડ રૂપિયાથી વધુની સંપત્તિ એન્ટી મની લોન્ડરિંગ એક્ટ હેઠળ જપ્ત કરવામાં આવી હતી. જેમાં ઉત્તરાખંડમાં 25 સ્થાવર મિલકતો અને યુપીના મેરઠમાં બનેલા મોલનો સમાવેશ થાય છે.
