ભારતીય ટીમે વેસ્ટ ઈન્ડિઝ સામેની પ્રથમ ટેસ્ટમાં પોતાની સ્થિતિ મજબૂત કરી લીધી છે. પ્રથમ બેટિંગ કરવા ઉતરેલી વેસ્ટ ઈન્ડિઝની ટીમ માત્ર 150 રનમાં ઓલઆઉટ થઈ ગઈ. આ પછી ટીમ ઈન્ડિયા તરફથી યશસ્વી જયસ્વાલ અને કેપ્ટન રોહિત શર્માએ પ્રથમ વિકેટ માટે 229 રનની ભાગીદારી કરી અને વિન્ડીઝ ટીમને બેકફૂટ પર ધકેલી દીધી. ભારતે અત્યાર સુધી 2 વિકેટના નુકસાન પર 312 રન બનાવ્યા છે અને 162 રનની લીડ મેળવી લીધી છે. કેપ્ટન રોહિત શર્માએ આ મેચમાં સદી ફટકારીને બે મોટા રેકોર્ડ બનાવ્યા.
બંને ફોર્મેટમાં 10થી વધુ સદી
રોહિત શર્માએ વેસ્ટ ઈન્ડિઝ સામે ખૂબ જ કંપોઝ બેટિંગ કરી, જ્યારે તે વિસ્ફોટક બેટિંગ માટે જાણીતા છે. તેમણે વિન્ડીઝ સામેની પ્રથમ ટેસ્ટમાં કોઈ ઉતાવળ ન બતાવી અને 221 બોલમાં 103 રન બનાવ્યા. ટેસ્ટ ક્રિકેટમાં આ તેમની 10મી સદી છે. આ સાથે તે ભારત માટે ટેસ્ટ અને વનડેમાં 10થી વધુ સદી ફટકારનાર છઠ્ઠા ખેલાડી બની ગયા છે. રોહિતના નામે વનડેમાં 30 અને ટેસ્ટમાં 10 સદી છે. ભારત માટે અત્યાર સુધી માત્ર સચિન તેંડુલકર, વિરાટ કોહલી, રાહુલ દ્રવિડ, સૌરવ ગાંગુલી, વિરેન્દ્ર સેહવાગ અને રોહિત શર્માએ ટેસ્ટ અને વનડે બંને ફોર્મેટમાં 10 થી વધુ સદી ફટકારી છે.
આવું કરનાર માત્ર બીજા બેટ્સમેન
કેપ્ટન રોહિત શર્માએ વેસ્ટ ઈન્ડિઝ સામે સદી ફટકારતાની સાથે જ ટેસ્ટમાં પોતાના 3500 રન પૂરા કર્યા. આ સાથે તે ત્રણેય ફોર્મેટમાં 3500થી વધુ રન બનાવનાર ભારતના માત્ર બીજા ખેલાડી બની ગયા છે. આ પહેલા વિરાટ કોહલી આ કરી ચુક્યા છે. રોહિતે ભારત માટે ટેસ્ટમાં 3500 રન, વનડેમાં 9825 રન અને ટી20માં 3853 રન બનાવ્યા છે.
વિસ્ફોટક બેટિંગમાં નિષ્ણાત
રોહિતની ગણતરી વિશ્વના શ્રેષ્ઠ ખેલાડીઓમાં થાય છે. તેમણે ભારતીય ટીમને ઘણી મેચો પોતાના દમ પર જીતાડી છે, જ્યારે તે પોતાની લયમાં હોય છે ત્યારે તે કોઈપણ બોલિંગ આક્રમણને તોડી શકે છે. ODI ક્રિકેટમાં તેમના નામે ત્રણ બેવડી સદી છે. આ સિવાય તેમણે ટેસ્ટ મેચમાં બેવડી સદી પણ ફટકારી છે.
