મેસેજિંગ અને વીડિયો કોલિંગ માટે વિશ્વભરમાં WhatsAppનો સૌથી વધુ ઉપયોગ થાય છે. સમગ્ર વિશ્વમાં 2 અબજથી વધુ લોકો આ એપ્લિકેશનનો ઉપયોગ કરે છે. આ જ કારણ છે કે કંપની તેના ગ્રાહકોની સુવિધા માટે નવા ફીચર્સ અને અપડેટ્સ લાવતી રહે છે. હવે કંપનીએ વોટ્સએપ યુઝર્સને એક મોટું અપડેટ આપ્યું છે, જેની માંગ છેલ્લા ઘણા મહિનાઓથી થઈ રહી હતી. જો તમે વોટ્સએપ યુઝર છો, તો હવે તમે સરળતાથી HD ક્વોલિટીમાં ફોટા મોકલી શકો છો.
અત્યાર સુધી, જ્યારે આપણે WhatsAppમાં હાઇ રિઝોલ્યુશન ફોટા મોકલતા હતા, ત્યારે તેની ક્વોલિટી ખરાબ થઈ જતી હતી અને સાઈઝ પણ નાની થઈ જતી હતી, પરંતુ હવે તમે સરળતાથી હાઈ રીઝોલ્યુશન ફોટા મોકલી શકશો. વોટ્સએપના આ અપગ્રેડની માહિતી મેટાના સીઈઓ માર્ક ઝકરબર્ગે પોતે આપી હતી. ગુરુવારે સાંજે, તેમણે બધા યુઝર્સ માટે HD ફોટો ફીચર રિલીઝ કરી દીધું.
માર્ક ઝકરબર્ગે આપી માહિતી
માર્ક ઝકરબર્ગે ઈન્સ્ટાગ્રામ ચેનલ અને ફેસબુક પોસ્ટ દ્વારા વોટ્સએપના આ નવા ફીચર વિશે યુઝર્સને જાણકારી આપી. માર્કે આ ફીચરને લગતો એક વીડિયો પણ સોશિયલ મીડિયા પર શેર કર્યો છે. આ વીડિયોમાં તમે જોઈ શકો છો કે HD ફોટો ફીચર કેવી રીતે કામ કરે છે.
આ રીતે HD ફોટા મોકલી શકશે
વોટ્સએપમાં HD ફોટો મોકલવા માટે તમારે પહેલા વોટ્સએપનું લેટેસ્ટ વર્ઝન અપડેટ કરવું પડશે. એપ્લિકેશન અપડેટ થયા પછી, તમને WhatsApp પર ફોટો શેરિંગ ટેબમાં એક HD બટન દેખાશે. આ HD બટન પર ક્લિક કરતાની સાથે જ તમને બે વિકલ્પો મળશે જેમાં સ્ટાન્ડર્ડ સાઈઝ અને એચડી સાઈઝના વિકલ્પો હશે. જો તમે HD ગુણવત્તામાં ફોટો મોકલવા માંગતા હોવ તો તમારે HD વિકલ્પ પસંદ કરવો પડશે.
તમારે ધ્યાનમાં રાખવું પડશે કે જો તમે વોટ્સએપ પર HD ક્વોલિટીમાં ફોટા મોકલો છો, તો તમારો ડેટા વપરાશ વધુ થશે. HD ફોટો ફીચર પહેલા વોટ્સએપે તાજેતરમાં જ તેના યુઝર્સ માટે સ્ક્રીન શેરિંગ ફીચર બહાર પાડ્યું હતું. આમાં યુઝર્સ વીડિયો કોલિંગ દરમિયાન પોતાના ફોનની સ્ક્રીન પણ શેર કરી શકે છે.
