જો તમે આ વખતે એર ઈન્ડિયાની ફ્લાઈટમાં મુસાફરી કરો છો અને તમે એરલાઈનની મહિલા કર્મચારીઓને નવા ડ્રેસમાં જોશો તો નવાઈ પામશો નહીં. હા, ટાટા ગ્રૂપની માલિકીની એર ઈન્ડિયા પરિવર્તનના તબક્કામાંથી પસાર થઈ રહી છે. હાલમાં જ સમાચાર આવ્યા હતા કે એર ઈન્ડિયા, કેબિન ક્રૂ કર્મચારીઓનો યુનિફોર્મ બદલવા પર વિચાર કરી રહી છે. અત્યાર સુધી એર ઈન્ડિયાની મહિલા ક્રૂ મેમ્બર સાડી પહેરે છે. પરંતુ હવે તેના માટે એક નવો ડ્રેસ તૈયાર કરવામાં આવી રહ્યો છે.
10,000થી વધુ કર્મચારીઓ માટે યુનિફોર્મ તૈયાર કરવામાં આવશે
એર ઇન્ડિયાએ નવા ડ્રેસ ડિઝાઇન કરવા માટે પ્રખ્યાત ફેશન ડિઝાઇનર મનીષ મલ્હોત્રા સાથે ભાગીદારીની જાહેરાત કરી છે. આશા છે કે આ વર્ષે નવેમ્બર કે ડિસેમ્બર સુધીમાં સ્ટાફ નવા યુનિફોર્મમાં જોવા મળશે. મનીષ મલ્હોત્રા એર ઈન્ડિયાના 10,000થી વધુ કર્મચારીઓ માટે નવા યુનિફોર્મ ડિઝાઇન કરશે, જેમાં કેબિન ક્રૂ, કોકપિટ ક્રૂ, ગ્રાઉન્ડ અને સિક્યુરિટી સ્ટાફનો સમાવેશ થાય છે. આ પછી ફ્લાઇટ એટેન્ડન્ટ સાડીમાં જોવા નહીં મળે.
એર ઈન્ડિયાના કર્મચારીઓને ટૂંક સમયમાં નવો લુક મળશે
જ્યારથી ટાટા ગ્રૂપે એર ઈન્ડિયાનો કબજો સંભાળ્યો છે ત્યારથી એરલાઈન્સ વૈશ્વિક બજારમાં પોતાની ઓળખ બનાવવા માટે ફેરફારો કરી રહી છે. લગભગ છ દાયકા પછી એરલાઇન સ્ટાફના ડ્રેસમાં ફેરફાર થશે. વિસ્તારા એરલાઇનનો યુનિફોર્મ પણ એર ઇન્ડિયાના કર્મચારીઓ જેવો જ હશે. મનીષ મલ્હોત્રા સાથેના કરાર અંગે એર ઈન્ડિયાના સીઈઓ અને એમડી કેમ્પબેલ વિલ્સને કહ્યું કે, અમે એર ઈન્ડિયાને આગળ લઈ જવા માટે મનીષ મલ્હોત્રા સાથેના કરારથી ખૂબ જ ખુશ છીએ. તેમણે કહ્યું કે, એર ઈન્ડિયાના કર્મચારીઓને ટૂંક સમયમાં નવો લુક મળશે.
જ્યારે બીજી તરફ એર ઈન્ડિયા સાથેના કરાર બાદ મનીષ મલ્હોત્રાએ કહ્યું કે, હું આ કામ કરવા માટે ઉત્સાહિત છું. તેણે કહ્યું કે, આ માટે તેણે એર ઈન્ડિયાના ફ્રન્ટલાઈન કર્મચારીઓને મળવાનું શરૂ કર્યું છે. કર્મચારીઓની જરૂરિયાતોને વધુ સારી રીતે સમજવા માટે તેમની સાથે વાતચીત કરવામાં આવી રહી છે. તમને જણાવી દઈએ કે આ પહેલા ટાટા ગ્રૂપ દ્વારા અધિગ્રહણ કર્યા બાદ એર ઈન્ડિયાનો નવો લોગો બહાર પાડવામાં આવ્યો હતો. એર ઈન્ડિયાના વિમાનોમાં તેનું નામ નવી સ્ટાઈલમાં જોવા મળશે.
