અમદાવાદ ક્રાઈમ બ્રાન્ચ અને ડી. આર. આઈએ મહારાષ્ટ્રમાં મેગા ઓપરેશન હાથ ધર્યું હતું. જેમાં ઔરંગાબાદની ફેક્ટરીમાં કોકેઇન કેટામાઇન અને એમડી ડ્રગ્સ બની રહ્યું હતું. રો-મટિરિયલ તેમજ ડ્રગ્સ મળીને કુલ 500 કરોડનો મુદ્દામાલ કબજે કરવામાં આવ્યો છે. આ ફેક્ટરીની અંદર ડ્રગ્સ બનાવીને અલગ-અલગ જગ્યાએ સપ્લાય કરવામાં આવતું હતું.
અમદાવાદ ક્રાઈમ બ્રાન્ચના પોલીસ ઇન્સ્પેક્ટર હાલ આ સમગ્ર તપાસ સાથે જોડાયેલા છે. બીજી તરફ આટલા મોટા પ્રમાણમાં ડ્રગ્સ બનાવતી ફેક્ટરી ઝડપાતા દેશની ટોચની સુરક્ષા એજન્સીઓ પણ એક્ટિવ થઈ છે. અમદાવાદ ક્રાઈમ બ્રાન્ચના અધિકારીઓને માહિતી મળી હતી કે, મહારાષ્ટ્રના ઔરંગાબાદમાં એક ફેક્ટરીની અંદર કોકેઇન કેટામાઇન અને એમ. ડી. ડ્રગ્સનો મોટો જથ્થો પડ્યો છે. આ સમગ્ર બાબતે અમદાવાદ ક્રાઈમ બ્રાન્ચના એક પોલીસ ઇન્સ્પેક્ટર અને ડીસીપી આ સમગ્ર બાબતનું સર્વેલન્સ કરી રહ્યા હતા. તેમાં ઔરંગાબાદની એક ફેક્ટરીની કડી મળી હતી. જ્યાં ક્રાઈમ બ્રાન્ચના અધિકારીએ ડી. આર. આઈની મદદ લઈને ઔરંગાબાદમાં એક મોટું ઓપરેશન હાથ ધર્યું હતું.
ઔરંગાબાદની ફેક્ટરીમાં 200 કરોડનું ડ્રગ્સ અને 300 કરોડનું રો-મટિરિયલ મળીને કુલ 500 કરોડનો ડ્રગનો જથ્થો મળી આવ્યો છે. આટલા મોટો ઓપરેશન બાદ દેશની ટોચની એજન્સીઓ પણ ચોંકી ઊઠી છે. હાલ આ સમગ્ર ઓપરેશન પૂર્ણ થયું છે અને આ સમગ્ર વિગતની કડીઓ જોડવા માટે પ્રયાસો હાથ ધરવામાં આવ્યા છે. સમગ્ર દેશમાં કોઈ રાજ્યની પોલીસે સૌથી મોટું ઓપરેશન કર્યું હોય તેવું અમદાવાદ ક્રાઈમ બ્રાન્ચે આ મોટું ઓપરેશન હાથ ધર્યું હતું અને તેમાં તેમને સફળતા મળી છે.
