રાષ્ટ્રીય રાજધાની દિલ્હીની ઘણી શાળાઓમાં બોમ્બની ધમકી મળી છે. માહિતી અનુસાર, ભટનાગર પબ્લિક સ્કૂલ, પશ્ચિમ વિહાર, કેમ્બ્રિજ સ્કૂલ શ્રી નિવાસપુરી, ડીપીએસ ઈસ્ટ ઓફ કૈલાશ, દક્ષિણ દિલ્હી પબ્લિક સ્કૂલ ડિફેન્સ કોલોની, દિલ્હી પોલીસ પબ્લિક સ્કૂલ સફદરજંગ એન્ક્લેવ અને વેંકટેશ પબ્લિક સ્કૂલ રોહિણીમાં ફોન પર ધમકીઓ મળી છે.
મળતી માહિતી મુજબ સવારે સાડા ચાર વાગ્યે બોમ્બની ધમકીનો પહેલો કોલ આવ્યો હતો. આ પછી, શાળાઓને એક ઇમેઇલ મોકલવામાં આવ્યો હતો જેમાં જણાવવામાં આવ્યું હતું કે ત્યાં બોમ્બ મૂકવામાં આવ્યા છે અને ટૂંક સમયમાં તેને વિસ્ફોટ કરવામાં આવશે. જો કે પોલીસ તપાસમાં હજુ સુધી કાઇ મળ્યું નથી. એક શાળા દ્વારા મળેલા ધમકીભર્યા ઈમેલમાં કહેવામાં આવ્યું છે કે તમારી શાળાના પરિસરમાં ઘણા વિસ્ફોટકો મૂકવામાં આવ્યા છે અને મને ખાતરી છે કે તમે બધા શાળાના પરિસરમાં પ્રવેશતી વખતે વારંવાર તમારા વિદ્યાર્થીઓની બેગની તપાસ કરશો નહીં. બોમ્બ ઈમારતોને નષ્ટ કરવા અને લોકોને નુકસાન પહોંચાડવા માટે પૂરતો શક્તિશાળી છે.
ધમકી આપનાર વ્યક્તિએ ઈમેલમાં લખ્યું છે કે, અમને જાણવા મળ્યું છે કે શાળામાં શુક્રવાર અને શનિવારે પીટીએમ યોજાવા જઈ રહ્યું છે. આ દરમિયાન વાલીઓ અને શિક્ષકો ઉપરાંત બાળકો પણ હાજર રહેશે. બોમ્બ બ્લાસ્ટ માટે આ સારી તક હશે. 13 ડિસેમ્બર 2024 અને 14 ડિસેમ્બર 2024 એ તમારી શાળાએ બોમ્બ વિસ્ફોટનો સામનો કરવો પડશે. ધમકીભર્યા ઈમેલમાં લખવામાં આવ્યું છે કે સ્કૂલમાં બોમ્બ મુકવામાં આવ્યા છે અને 13 અને 14 ડિસેમ્બરે બ્લાસ્ટ કરવામાં આવશે. અમારી માંગણીઓ સંદર્ભે આ ઈમેલનો જવાબ આપો, નહીંતર બોમ્બ વિસ્ફોટ કરવામાં આવશે.
અગાઉ દિલ્હીની 40 થી વધુ શાળાઓને 8 ડિસેમ્બરે રાત્રે 11:38 વાગ્યે સમાન ધમકીભર્યો ઈમેલ મળ્યો હતો. જેમાં દાવો કરવામાં આવ્યો હતો કે તેમના કેમ્પસમાં બોમ્બ મુકવામાં આવ્યા હતા. મેલમાં કહેવામાં આવ્યું હતું કે જો બોમ્બ વિસ્ફોટ થશે તો મોટું નુકસાન થશે. મેલ મોકલનારએ બ્લાસ્ટ રોકવાના બદલામાં 30 હજાર ડોલરની માંગણી કરી હતી. જો કે પાછળથી તપાસમાં આ ફેક મેલ હોવાની જાણ થઈ હતી.
