અમેરિકાના વિદેશ મંત્રી માર્કો રુબિયોએ ભારત, કેનેડા અને કેન્યાના નેતાઓ સાથે ટેલિફોનિક વાતચીત કરીને મધ્ય પૂર્વની સ્થિતિ અને ઈરાન સામેની વ્યૂહનીતિ અંગે મહત્ત્વની ચર્ચા કરી છે. વોશિંગ્ટનથી મળેલી માહિતી અનુસાર, રુબિયોએ ભારતના વિદેશ મંત્રી એસ. જયશંકર સાથે ખાસ વાતચીત કરી હતી, જેમાં પશ્ચિમ એશિયામાં વધી રહેલા તણાવ અને બદલાતી પરિસ્થિતિઓ પર ગહન મંથન કરવામાં આવ્યું હતું. બંને દેશોએ આ વિસ્તારમાં શાંતિ અને સ્થિરતા જાળવવા માટે સાથે મળીને કામ કરવાની પ્રતિબદ્ધતા દર્શાવી છે. અમેરિકન વિદેશ વિભાગના જણાવ્યા અનુસાર, ભારત અને અમેરિકા પરસ્પર પ્રાથમિકતાઓને આગળ વધારવા માટે સંમત થયા છે.આ કૂટનીતિક હલચલ માત્ર ભારત પૂરતી મર્યાદિત નથી. માર્કો રુબિયોએ કેનેડાના વિદેશ મંત્રી અનીતા આનંદ સાથે પણ ઈરાનના પરમાણુ કાર્યક્રમને રોકવા માટે ટ્રમ્પ દ્વારા લેવામાં આવેલા પગલાં અને આંતરરાષ્ટ્રીય સુરક્ષા પર ચર્ચા કરી હતી. આ ઉપરાંત, આફ્રિકાના મહત્ત્વના સહયોગી દેશ કેન્યાના પ્રમુખ વિલિયમ રુટો સાથેની વાતચીતમાં રુબિયોએ ઈરાનની આક્રમકતાની નિંદા કરવા બદલ તેમનો આભાર માન્યો હતો. આ વાતચીત દરમિયાન ‘ઓપરેશન એપિક ફ્યુરી’ના ઉદ્દેશ્યો અને હૈતીમાં શાંતિ સ્થાપવા માટે રચાયેલી ‘ગેંગ સપ્રેશન ફોર્સ’માં કેન્યાના સહયોગની પણ પ્રશંસા કરવામાં આવી હતી.અમેરિકા અત્યારે એશિયા, ઉત્તર અમેરિકા અને આફ્રિકાના પોતાના મુખ્ય ભાગીદાર દેશો સાથે તાલમેલ મજબૂત કરી રહ્યું છે. ઈરાનનો વધતો પ્રભાવ અને વૈશ્વિક સુરક્ષાના પડકારોને પહોંચી વળવા માટે અમેરિકન પ્રમુખનું વહીવટીતંત્ર સતત સક્રિય દેખાઈ રહ્યું છે. ભારત, કેનેડા અને કેન્યા જેવા દેશો સાથેનો આ સંવાદ એ સ્પષ્ટ કરે છે કે આવનારા સમયમાં મધ્ય પૂર્વ અને આંતરરાષ્ટ્રીય સુરક્ષાના મુદ્દે અમેરિકા પોતાના સાથી દેશો સાથે મળીને વધુ કડક અને નિર્ણાયક વલણ અપનાવી શકે છે.
