ભાવનગરના અશ્વપ્રેમી નાગરિકો અને વિદ્યાર્થીઓમાં સાહસિકતાની ભાવના વિકસે તથા પોલીસ અને જનતા વચ્ચે સમન્વય જળવાય રહે તેવા હેતુસર ભાવનગર જિલ્લા પોલીસ દ્વારા પ્રશંસનીય કામગીરી કરવામાં આવી રહી છે. ભાવનગર રેન્જ આઈજી રાજેન્દ્ર વી. અસારી અને જિલ્લા પોલીસ વડા નિતેશ પાંડેયની સૂચના અને માર્ગદર્શન હેઠળ ‘આર.ડી.ઝાલા હોર્સ રાઇડિંગ ક્લબ’ દ્વારા આમ જનતાને અશ્વસવારીની વ્યવસાયિક તાલીમ આપવામાં આવી રહી છે.
મુખ્ય મથકના ડીવાયએસપી આર.વી. ડામોર, રિઝર્વ પોલીસ ઇન્સ્પેક્ટર પી.એસ. સોલંકી અને માઉન્ટેડ વિભાગના પીએસઆઈ એ.આર. શેખની દેખરેખ હેઠળ કાર્યરત આ ક્લબમાં ૩ મહિનાનો બેઝિક કોર્સ અને ૩ મહિનાનો એડવાન્સ કોર્સ એમ બે પ્રકારની તાલીમ આપવામાં આવે છે. તાલીમાર્થીઓને અશ્વ સવારીની સાથે ટેન્ટ પેગિંગ, જમ્પિંગ, સિંગલ અને ડબલ રાઇડ પરેડ, બેરલ રેસ, ક્રોસ કન્ટ્રી તેમજ અશ્વ પર જનરલ એક્સરસાઇઝની ઉત્તમ તાલીમ આપવામાં આવે છે.
જ્વેલ સર્કલ પાસે આવેલા પોલીસ અશ્વદળ ખાતે હાલમાં કુલ ૨૬ પાણીદાર અશ્વો ઉપલબ્ધ છે. છેલ્લા ૬ મહિનામાં આ ક્લબ ખાતે કુલ ૯૩ તાલીમાર્થીઓ (૮૩ પુરુષ અને ૧૦ મહિલા) એ સફળતાપૂર્વક તાલીમ મેળવી છે. જ્યારે ગત તા. ૩૧ મે ૨૦૨૬ ના રોજ ૧૧ તાલીમાર્થીઓએ પોતાનો ૩ મહિનાનો બેઝિક કોર્સ પૂર્ણ કર્યો છે. તાલીમ પૂર્ણ કરનારા તમામ ઉમેદવારોને ક્લબ તરફથી પ્રમાણપત્ર એનાયત કરી પ્રોત્સાહિત કરવામાં આવ્યા હતા.
આર.ડી.ઝાલા હોર્સ રાઇડિંગ ક્લબ ખાતે ૯૩ લોકોએ મેળવી ઘોડેસવારીની તાલીમ બેઝિક કોર્સ પૂર્ણ કરનારા ૧૧ તાલીમાર્થીઓને પ્રમાણપત્ર એનાયત
