સિહોરના ટાણા ચોકડી નજીક આંબલા ગામનો શિવાંશ દિવ્યેશભાઈ નામનો બાળક પરિવારથી વિખૂટો પડી ગયો હતો. રડતી હાલતમાં મળી આવેલા આ બાળકને સ્થાનિક યુવક અને પોલીસે પરિવાર સાથે સુરક્ષિત રીતે મિલન કરાવ્યું છે.
બાળકને ટાણા ચોકડી પાસેથી પસાર થઈ રહેલા મેહુલભાઈ ભરવાડે જોયો હતો. તેમણે બાળકને શાંત પાડી તેનું નામ અને ગામ સહિતની વિગતો મેળવી હતી. મેહુલભાઈએ આસપાસના વિસ્તારમાં બાળકના માતા-પિતાની શોધખોળ કરી હતી, પરંતુ કોઈ ભાળ મળી નહોતી.
પરિવારજનોનો સંપર્ક ન થતાં મેહુલભાઈ ભરવાડે તાત્કાલિક 112 ઇમરજન્સી સેવાનો સંપર્ક કર્યો. ઘટનાની જાણ થતાં જ 112 પોલીસ સ્ટાફના મુન્નાભાઈ પરમાર સહિતની ટીમ સ્થળ પર પહોંચી અને બાળકને પોતાની કસ્ટડીમાં લીધો.
પોલીસે જરૂરી કાર્યવાહી કર્યા બાદ સિહોર પોલીસ સ્ટેશન ખાતે બાળકના દાદાને બોલાવ્યા હતા. ઓળખની ખાતરી કર્યા પછી બાળકને સુરક્ષિત રીતે તેમના હવાલે સોંપવામાં આવ્યો. સ્થાનિક નાગરિક અને પોલીસની સતર્કતાને કારણે બાળકનું પરિવાર સાથે સુરક્ષિત મિલન શક્ય બન્યું.
