ભાવનગર જિલ્લામાં દારૂ-જુગારની પ્રવૃત્તિઓને નેસ્તનાબૂદ કરવા માટે રેન્જ આઇ.જી.પી. આર.વી. અસારી તથા પોલીસ અધિક્ષક નિતેશ પાંડે દ્વારા આપવામાં આવેલી કડક સૂચના અન્વયે વલ્લભીપુર પોલીસે એક સફળ કામગીરી પાર પાડી છે. સિહોર વિભાગના નાયબ પોલીસ અધિક્ષક જે.એચ. દહિયા અને વલ્લભીપુર પોલીસ સ્ટેશનના ઇન્ચાર્જ પોલીસ ઇન્સ્પેક્ટર એમ.આર. ભલગરીયાના માર્ગદર્શન હેઠળ પોલીસ સ્ટાફ વિસ્તારમાં પેટ્રોલીંગમાં હતો.તે દરમિયાન પોલીસ કોન્સ્ટેબલ યુવરાજસિંહ ગોહિલને ચોક્કસ બાતમી મળી હતી કે, કંથારીયાથી ખેતાટીંબી ગામ તરફ જવાના રસ્તા પર આવેલી બાવળની કાંટમાં એક સિલ્વર કલરની ઇકો કારમાં વિદેશી દારૂનો જથ્થો રાખીને તેને સગેવગે કરવાની ફિરાક કરવામાં આવી રહી છે. બાતમીના આધારે પોલીસે ત્વરિત દરોડો પાડ્યો હતો. જો કે, મુખ્ય આરોપી નરેન્દ્ર ઉર્ફે નરેશ ઉર્ફે નરો બાબુભાઇ દલસાણીયા રહે. કંથારીયા પોલીસને જોઈને સ્થળ પરથી ફરાર થઈ ગયો હતો.
પોલીસે ઘટનાસ્થળેથી મારૂતિ ઇકો કાર નં. GJ-04-AP-3976ની તલાશી લેતા તેમાંથી વિદેશી દારૂની નાની-મોટી કુલ ૪૦૨ બોટલો મળી આવી હતી.પોલીસે કાર અને દારૂ સાથે કુલ રૂ. 2.71 લાખનો મુદામાલ જપ્ત કરી પ્રોહિબિશન હેઠળ ગુનો નોંધી ધોરણસરની કાર્યવાહી હાથ ધરી હતી.
