અમેરિકન બિઝનેસમેન ઇલોન મસ્કની કંપની સ્પેસએક્સનું એક મહાકાય બેકાબૂ રોકેટ ચંદ્રની સપાટી સાથે અથડાયું છે. 4 હજાર કિલો વજનનું અને લગભગ 5 માળની ઇમારત જેટલું મોટું આ રોકેટ લગભગ 8,690 કિમી/કલાકની ઝડપે અથડાયું. નાસાએ કહ્યું કે, ‘આ ટક્કરથી પૃથ્વીને કોઈ ખતરો નથી. જોકે, આ ટક્કરથી હાલ શું પરિસ્થિતિ છે તેની હકીકત તસવીરો આવ્યા પછી ખબર પડશે.
આ બેકાબૂ ટુકડો સ્પેસએક્સના ‘ફાલ્કન 9’ રોકેટનો ઉપરનો ભાગ છે. તેને જાન્યુઆરી 2025માં ફ્લોરિડાથી અમેરિકા અને જાપાનના બે લુનર લેન્ડરને અવકાશમાં મોકલવા માટે લોન્ચ કરવામાં આવ્યું હતું. મિશન પૂરું થયા પછી રોકેટનો આ ભાગ અવકાશમાં તરતો રહી ગયો.છેલ્લા 18 મહિના દરમિયાન પૃથ્વી, ચંદ્ર અને સૂર્યના ગુરુત્વાકર્ષણના કારણે તેનો માર્ગ ધીમે ધીમે બદલાઈ ગયો. ખગોળશાસ્ત્રીઓએ ડેટાનો અભ્યાસ કરીને પહેલેથી જ અનુમાન લગાવ્યું હતું કે, આ રોકેટ ભટકીને સીધું ચંદ્ર તરફ જઈ રહ્યું છે અને તેની સાથે અથડાશે.
15 જાન્યુઆરી 2025ના રોજ કેનેડી સ્પેસ સેન્ટરના ફ્લોરિડા સ્થિત લોન્ચ સેન્ટર 39Aથી ‘બ્લુ ઘોસ્ટ’ અને ‘હકુટો-આર’ને લઈને સ્પેસએક્સના ફાલ્કન 9 રોકેટે ઉડાન ભરી હતી.આ ટક્કર ચંદ્રના ‘આઈન્સ્ટાઈન ક્રેટર’ પાસે થઈ. આ વિસ્તાર ચંદ્રના તે ભાગમાં છે, જ્યાં દિવસનો પ્રકાશ રહે છે અને જે પૃથ્વી પરથી દેખાય છે. જોકે, વૈજ્ઞાનિકોના મતે તેને સામાન્ય ટેલિસ્કોપથી જોવું અશક્ય હતું, કારણ કે ટક્કર સમયે બનેલો પ્રકાશ ખૂબ જ ઝાંખો હતો. દક્ષિણ કોરિયાનું ‘દાનુરી’ ઓર્બિટર અને નાસાનું ‘લુનર રિકોનિસન્સ ઓર્બિટર’ (LRO) આવનારા દિવસોમાં ટક્કરવાળી જગ્યા ઉપરથી પસાર થશે અને તસવીરો લેશે. વૈજ્ઞાનિકો જૂની અને નવી તસવીરોની સરખામણી કરીને ચંદ્રની સપાટી પર બનેલા નવા નિશાનની ઓળખ કરશે.આ ટક્કર પછી ચંદ્ર પર માણસો દ્વારા છોડવામાં આવેલી અથવા દુર્ઘટનાગ્રસ્ત થયેલી વસ્તુઓની સંખ્યા વધીને લગભગ 3,000 થઈ ગઈ છે. તેમનું કુલ વજન લગભગ 190 ટન થઈ ગયું છે.
