બંગાળની ખાડીમાં સર્જાયેલા ડીપ ડિપ્રેશનને કારણે પૂર્વ, મધ્ય અને દક્ષિણ ભારતમાં ચોમાસું રૌદ્ર સ્વરૂપ ધારણ કરી રહ્યું છે.હવામાન વિભાગ અનુસાર ઓડિશામાં રેડ એલર્ટ જાહેર કરાયું છે, જ્યાં 33 ODRAF ટીમો તૈનાત કરાઈ છે. 7 જિલ્લામાં શૈક્ષણિક સંસ્થાઓ 24 સપ્ટેમ્બર સુધી બંધ છે. સરકારી કર્મચારીઓની રજાઓ રદ કરાઈ છે અને માછીમારોને દરિયામાં ન જવાની સૂચના અપાઈ છે. યુપી, બિહાર અને ઉત્તરાખંડમાં પણ ભારે વરસાદની આગાહી છે.
દેશના અનેક વિસ્તારોમાં ચોમાસું ફરી એકવાર રૌદ્ર સ્વરૂપ ધારણ કરી રહ્યું છે. બંગાળની ખાડી ઉપર સર્જાયેલા ગંભીર દબાણ (ડીપ ડિપ્રેશન) ના કારણે પૂર્વીય, મધ્ય અને દક્ષિણ ભારતના અનેક રાજ્યોમાં હવામાનનો મિજાજ બદલાયો છે. ભારતીય હવામાન વિભાગના જણાવ્યા અનુસાર, આ સિસ્ટમ ગતિશીલ બનીને જમીન સાથે ટકરાવા જઈ રહી છે, જેના કારણે આગામી દિવસોમાં અનેક જગ્યાએ ભારેથી અતિભારે વરસાદની ચેતવણી આપવામાં આવી છે. હવામાન વિભાગની ચેતવણીને પગલે ઓડિશામાં સૌથી વધુ અસર જોવા મળી રહી છે. તટીય અને દક્ષિણી વિસ્તારોમાં ધોધમાર વરસાદ વરસી રહ્યો છે.
સંભવિત આપત્તિને પહોંચી વળવા માટે રાજ્ય સરકાર દ્વારા 33 ઓડ્રાફ (ODRAF) ટીમો તૈનાત કરવામાં આવી છે, જેમાંથી 24 ટીમો અત્યંત સંવેદનશીલ જિલ્લાઓમાં મોકલવામાં આવી છે. શૈક્ષણિક સંસ્થાઓ બંધ: પરિસ્થિતિની ગંભીરતા જોતાં સાત જિલ્લાઓમાં શૈક્ષણિક સંસ્થાઓ 24 સપ્ટેમ્બર સુધી બંધ રાખવાનો આદેશ અપાયો છે. કટોકટીના પગલે તમામ સરકારી કર્મચારીઓની રજાઓ રદ કરીને ડ્યુટી પર હાજર રહેવા સૂચના અપાઈ છે. દરિયાકાંઠે 75 કિલોમીટર પ્રતિ કલાકની ઝડપે પવન ફૂંકાય તેવી શક્યતા હોવાથી 24 સપ્ટેમ્બર સુધી માછીમારોને દરિયામાં ન જવા અને પુરીના દરિયાકિનારે નાહવા પર સંપૂર્ણ પ્રતિબંધ મૂકવામાં આવ્યો છે.ઉત્તર પ્રદેશ અને ઉત્તરાખંડ: પૂર્વીય યુપીમાં ગુરુવારથી ગાજવીજ સાથે વરસાદની શરૂઆત થશે અને 25-26 સપ્ટેમ્બર દરમિયાન ભારે વરસાદનું અનુમાન છે. બીજી તરફ, ઉત્તરાખંડમાં શુક્રવારથી વરસાદનું જોર વધીને શનિવારે પર્વતીય વિસ્તારોમાં અતિભારે વરસાદ પડી શકે છે.
