મણિપુરમાં ફરી હિંસા ભડકી! એક મહિલાનું મોત થતાં 48 કલાક સુધી બંધનું એલાન

મણિપુરમાં છેલ્લા કેટલાય સમયથી હિંસાત્મક માહોલ ચાલી રહ્યો છે. અત્યારે ફરી મણિપુરમાં હિંસા ભડકી છે. સૂત્રોના જણાવ્યાં પ્રમાણે કાંગપોકપી જિલ્લામાં શંકાસ્પદ ઉગ્રવાદીઓના બે જૂથો વચ્ચે ગોળીબાર થયો તેમાં એક કુકી સમુદાયની મહિલાનું મોત થયું છે, જ્યારે અન્ય બે લોકો ઘાયલ પણ થયાં છે. આ ઘટના બાદ કુકી સમુદાય દ્વારા જિલ્લામાં 48 કલાક સુધી સંપૂર્ણ બંધનું એલાન કરવામાં આવ્યું છે.
કુકી સમુદાય દ્વારા બંધના એલાન સાથે આ જિલ્લામાંથી તમામ સુરક્ષા દળોને હટાવી લેવામાં આવે તેવી પણ માંગણી કરવામાં આવી છે. આ લોકો દ્વારા આક્ષેપ કરવામાં આવ્યો છે કે, સુરક્ષાદળો નાગરિકોની સુરક્ષા કરવામાં નિષ્ફળ રહ્યાં છે. આ સ્થિતિને જોતા અત્યારે હિંસા ફરી ઉગ્ર બનશે તેવું લાગી રહ્યું છે. મણિપુરમાં છાશવારે આવી હિંસા જોવા મળે છે, જેમાં કેટલાક લોકોને પોતાનો જીવ પણ ગુમાવવો પડતો હોય છે.
વર્તમાનમાં જે હિંસા ભડકી છે તેના કારણ વિશે હજી કોઈ સત્તાવાર વિગતો પ્રકાશમાં આવી નથી. પરંતુ આમાં કુકી સમુદાયની મહિલાનું મોત થયું તેના કારણે આ સમુદાય ભારે રોષે ભરાયો છે અને બંધના એલાનની ધમકી આપી છે. મણિપુરમાં આ સમુદાયો વચ્ચે વર્ષોથી હિંસા થતી આવી છે. જેમાં સ્થાનિક લોકો વધારે પરેશાન થઈ રહ્યાં છે. આ મામલે હવે સરકાર દ્વારા કેવી કાર્યવાહી અને પગલા ભરવામાં આવશે તે જોવાનું રહેશે.