ભાવનગર અમદાવાદ શોર્ટ રૂટ પર ગત રાત્રીના સમયે કાર અને ટ્રક વચ્ચે અકસ્માતની ઘટનામાં પાલીતાણાથી અમદાવાદ પરત જઈ રહેલા જૈન પરિવારના બાળક, મહિલા સહિત પાંચ વ્યક્તિના કરુણ મોત નીપજ્યા હતા.ઘટનાના પગલે ૧૦૮ એમ્બ્યુલન્સ, પોલીસ તેમજ સ્થાનિક લોકો દોડી આવ્યા હતા અને કારમાં ફસાયેલા મૃતદેહો બહાર કાઢી ભાવનગર હોસ્પિટલ ખસેડયા હતા. આ બનાવ અંગે મળતી વિગતો મુજબ મૂળ રાજસ્થાનના ભીમનાલના વતની અને અમદાવાદમાં રહેતા મહાવીરભાઈ રતનલાલ જૈન (ઉ.વ.૪૨), તેમના સાસુ પુષ્પાદેવી ભનમલ જૈન (ઉ.વ.૬૫), રમીલાબેન મહાવીરભાઈ જૈન (ઉ.વ.૪૦), નરેશભાઈ ભાનમલ જૈન (ઉ.વ.૩૦) અને જૈનમ મહાવીરકુમાર જૈન (ઉ.વ.૧૨) પાલિતાનામાં ચાલતા ઉપધાન તપમાં શાતા પૂછવા માટે આવ્યા હતા અને ગત રાત્રીના સમયે અમદાવાદ પરત જવા માટે નીકળ્યા હતા ત્યારે ભાવનગર અમદાવાદ શોર્ટ રૂટ પર આવેલ આધેલાઈ અને તુલસી હોટલ વચ્ચે આધેલાઈ ચેક પોસ્ટ પહેલા કાર અને ટ્રક વચ્ચે અકસ્માત થતા કારમાં મુસાફરી કરી રહેલા બાળક સહિત પાંચ વ્યક્તિના કમકમાટી ભર્યા મોત નીપજ્યા હતા.અકસ્માત બાદ ટ્રક છોડી ટ્રક ચાલક ફરાર થઈ ગયો હતો.
આ બનાવની જાણ થતાં ૧૦૮ એમ્બ્યુલન્સ,વેળાવદર પોલીસ અને સ્થાનિક લોકો દોડી ગયા હતા અને કારમાં ફસાયેલા મૃતદેહોને કાર તોડીને બહાર કાઢ્યા હતા અને હોસ્પિટલ ખસેડાયા હતા. અકસ્માતની આ ઘટના અંગે વેળાવદર ભાલ પોલીસે ટ્રક ચાલક વિરુદ્ધ ગુનો નોંધી તપાસ હાથ ધરી છે.
