રાજ્યમાં માર્ગ અકસ્માતની ઘટનાઓ સતત વધી રહી છે. આ તરફ વધુ એક અકસ્માતની ઘટના સામે આવી છે. રવિવારની મોડીરાત્રે આણંદ એક્સપ્રેસ હાઇવે મરણની ચિચિયારીઓથી ગુંજી ઉઠ્યો હતો. રાત્રિના સમયે હાઇવે પર ઊભેલી ટ્રક પાછળ ઇકો કાર ઘૂસી જતાં એકસાથે ત્રણ લોકોના કમકમાટીભર્યા મોત નિપજતા પંથકમાં શોકનો માહોલ વ્યાપી ગયો છે.
આણંદ એક્સપ્રેસ હાઇવે પર મધરાત્રે દર્દનાક અકસ્માતની ઘટના સામે આવી છે. પ્રાથમિક વિગતો મુજબ આણંદ એક્સપ્રેસ હાઇવે પર ખંભોળજ પોલીસ મથક વિસ્તારમાં આ અકસ્માત સર્જાયો હતો. હાઇવે પર ઊભેલી એક ટ્રક પાછળ ઇકો કાર ઘૂસી ગઈ હતી. જોકે આ દરમ્યાન ઇકો કારમાં સવાર ત્રણ યુવકોના ઘટનાસ્થળે જ કરુણ મોત થયા હતા. વિગતો મુજબ આ યુવકો ઇકો કારના માલિકને વડોદરા મૂકી પરત ફરી રહ્યા હતા. આ દરમ્યાન મોડીરાત્રે આ યુવકોની કાર હાઇવે પર ઉભેલા એક ટ્રકની પાછળ ઘૂસી ગઈ હતી. ઇકો કાર ટ્રક પાછળ ઘૂસી જતાં ત્રણેય યુવકોના ઘટનાસ્થળે જ પ્રાણપંખેરુ ઊડી ગયા હતા.
અકસ્માતમાં મૃત્યુ પામનાર ત્રણેય યુવકો ડાકોરના હોવાનું સામે આવ્યું છે. આ તરફ ઘટનાની જાણ થતાં જ ખંભોળજ પોલીસે તાત્કાલિક સ્થળ પર પહોંચી મૃતકોની લાશને પોસ્ટમોર્ટમ અંગે મોકલી આપી આ અંગે વધુ તપાસ હાથ ધરી છે. આ તરફ ઘટનાની જાણ થતાં જ મૃતકોના પરિવારજનોમાં માતમ છવાયો છે.
