ઉત્તર પશ્ચિમ રાજસ્થાન અને તેને અડીને આવેલા વિસ્તારોમાં સાઈક્લોનિક સર્ક્યુલેશન સિસ્ટમ સર્જાઈ છે. તેની સાથે જ ઉત્તરી મધ્યપ્રદેશમાં ટ્રફ સર્જાયું છે. જ્યારે પાકિસ્તાન નજીક વેસ્ટર્ન ડિસ્ટર્બન્સ સર્જાયું છે. આ ત્રણ સિસ્ટમને કારણે ગુજરાતમાં છેલ્લા 2 દિવસ વરસાદ વરસી રહ્યો છે. ગઈકાલે પણ રાજ્યના 28 તાલુકામાં વરસાદ નોંધાયો છે.
છેલ્લા 24 કલાકમાં રાજ્યના 28 તાલુકામાં વરસાદ નોંધાયો છે. જેમાં સૌથી વધુ કચ્છના અંજારમાં નોંધાયો છે. અંજારમાં 24 કલાકમાં પોણા 2 ઈંચ વરસાદ નોંધાયો છે. હવામાન વિભાગે આજે પણ ગુજરાતમાં વરસાદની આગાહી કરી છે. હવામાન વિભાગના જણાવ્યા અનુસાર આજે અમદાવાદ, અરવલ્લી, બનાસકાંઠા, દાહોદ, ગાંધીનગર, ખેડા, મહીસાગર, મહેસાણા, પંચમહાલ, પાટણ, સાબરકાંઠા, અમરેલી, ભાવનગર અને કચ્છમાં વરસાદની આગાહી છે.
અમદાવાદના નરેન્દ્ર મોદી સ્ટેડિયમમાં સોમવારે રિઝર્વ ડે પર રમાયેલી મેચમાં પણ ગુજરાતની બેટિંગ પૂર્ણ થયા બાદ વરસાદ ખાબક્યો હતો જે બાદ મેચને રોકી દેવામાં આવી હતી. ધોધમાર વરસાદનાં કારણે ગ્રાઉન્ડ સ્ટાફ ત્વરિત ઝડપે કામે લાગી ગયો હતો. વરસાદ બંધ થયા બાદ તાત્કાલિક ગ્રાઉન્ડે સૂકાવવામાં આવ્યું હતું. થોડીવાર બાદ મેચ ફરી શરૂ થઈ હતી અને CSKની જીત થઈ હતી.
