ઓસ્ટ્રેલિયા અને ઈંગ્લેન્ડ વચ્ચે પાંચ મેચની એશિઝ શ્રેણી રમાઈ રહી છે. આ શ્રેણીની પ્રથમ બે મેચમાં જીત સાથે ઓસ્ટ્રેલિયન ટીમ 2-0થી આગળ છે. હાલમાં બંને ટીમો વચ્ચે શ્રેણીની ત્રીજી ટેસ્ટ મેચ રમાઈ રહી છે. આ મેચ જીતીને ઓસ્ટ્રેલિયન ટીમની નજર સીરીઝ પોતાના નામે કરવા પર છે. તમને જણાવી દઈએ કે આ મેચ સ્ટાર બેટ્સમેન સ્ટીવ સ્મિથની 100મી ટેસ્ટ મેચ છે. સ્મિથ ટેસ્ટ ક્રિકેટમાં દરરોજ કોઈને કોઈ મોટી સિદ્ધિ કરી રહ્યો છે. તેની 100મી ટેસ્ટ મેચ પર તેણે એક રેકોર્ડ પણ બનાવ્યો અને ઓસ્ટ્રેલિયાના ભૂતપૂર્વ દિગ્ગજ એલન બોર્ડરને પાછળ છોડી દીધો.
ઈંગ્લેન્ડ અને ઓસ્ટ્રેલિયા વચ્ચે રમાઈ રહેલી ત્રીજી એશિઝ ટેસ્ટ મેચમાં સ્ટીવ સ્મિથે એક મોટું કારનામું કર્યું છે. જો કે આ મેચની પ્રથમ ઇનિંગમાં તે માત્ર 22 રન જ બનાવી શક્યો હતો, પરંતુ તે એલન બોર્ડરને પાછળ છોડીને એશિઝ ટેસ્ટ મેચના ઇતિહાસમાં ત્રીજો સૌથી વધુ રન બનાવનાર ખેલાડી બની ગયો છે. સ્મિથે 61 ઇનિંગ્સમાં 3232 રન બનાવ્યા છે. આ સાથે જ એલન બોર્ડર 73 ઇનિંગ્સમાં 3222 રન બનાવીને આ યાદીમાં ચોથા સ્થાને પહોંચી ગયો છે. ઈંગ્લેન્ડ સામે સ્મિથનો રેકોર્ડ હંમેશા સારો રહ્યો છે. તેણે ઈંગ્લેન્ડ સામે અત્યાર સુધી 57.71ની એવરેજથી રન બનાવ્યા છે. આ દરમિયાન તેનો સર્વોચ્ચ સ્કોર 239 રન રહ્યો છે.
એશિઝ શ્રેણીમાં સૌથી વધુ રન બનાવનાર ખેલાડી
ડોન બ્રેડમેન – 5028 રન
જેક હોબ્સ – 3636 રન
સ્ટીવ સ્મિથ – 3226 રન
એલન બોર્ડર – 3222 રન
સ્ટીવ વો – 3173 રન
એશિઝ 2023માં સ્મિથ ફોર્મમાં
સ્ટીવ સ્મિથ તેની શાનદાર બેટિંગના કારણે અત્યારે વિશ્વનો સર્વશ્રેષ્ઠ ટેસ્ટ બેટ્સમેન છે. વર્લ્ડ ટેસ્ટ ચેમ્પિયનશિપ બાદ સ્મિથે હવે એશિઝમાં પોતાનું ફોર્મ ચાલુ રાખ્યું છે. સ્મિથની શાનદાર ઇનિંગના બળ પર ઓસ્ટ્રેલિયાએ બીજી ટેસ્ટ મેચમાં ઇંગ્લેન્ડને હરાવ્યું. આ મેચમાં તેણે પ્રથમ દાવમાં 110 રન અને બીજી ઈનિંગમાં 34 રન બનાવ્યા. આ સદી સાથે સ્મિથ ICC ટેસ્ટ રેન્કિંગમાં પણ બીજા સ્થાને પહોંચી ગયો છે. જો કે તે તેની 100મી ટેસ્ટ મેચની પ્રથમ ઈનિંગમાં વધુ કંઈ કરી શક્યો ન હતો અને 22 રન બનાવીને પેવેલિયન પરત ફર્યો હતો, પરંતુ ચાહકો અપેક્ષા રાખશે કે સ્મિથ તેની 100મી ટેસ્ટને યાદગાર બનાવવા માટે સદી ફટકારે.
