55 રન ઉમેર્યા બાદ 5 વિકેટ ગુમાવી
ચેન્નાઈના એમએ ચિદમ્બરમ સ્ટેડિયમમાં રમાયેલી વર્લ્ડ કપ મેચમાં દક્ષિણ આફ્રિકાએ પાકિસ્તાનને 1 વિકેટથી હરાવ્યું હતું. આ મેચમાં દક્ષિણ આફ્રિકાની ટીમ 271 રનના લક્ષ્યાંકનો પીછો કરતી વખતે મજબૂત દેખાઈ રહી હતી પરંતુ તેણે 55 રન ઉમેર્યા બાદ પોતાની છેલ્લી 5 વિકેટ ગુમાવી દીધી હતી. જોકે, સદનસીબે કેશવ મહારાજે વિનિંગ ફોર ફટકારી, નહીંતર પાકિસ્તાન જીત તરફ હતી. આ મેચમાં પાકિસ્તાનની ટીમ 46.4 ઓવરમાં 270 રન સુધી મર્યાદિત રહી હતી પરંતુ, દક્ષિણ આફ્રિકાએ 47.2 ઓવરમાં 9 વિકેટ ગુમાવીને લક્ષ્યાંક હાંસલ કરી લીધો હતો.
ખેલાડી પર ગુસ્સે થયો બાબર
આ મેચમાં સાઉથ આફ્રિકાની ઈનિંગનો છેલ્લો રન મોહમ્મદ નવાઝના બોલ પર આવ્યો, જેના કારણે બાબર આઝમ ખૂબ ગુસ્સે થઈ ગયો હતો. પાકિસ્તાને છેલ્લી વિકેટની લડાઈમાં પોતાનું સર્વશ્રેષ્ઠ પ્રદર્શન કર્યું હતું, પરંતુ ચેન્નાઈમાં તેઓ ઐતિહાસિક જીત હાંસલ કરી શક્યા ન હતા. પાકિસ્તાન તરફથી કેપ્ટન બાબર આઝમ (50) અને સઈદ શકીલે (52) અડધી સદી ફટકારી હતી. ટાર્ગેટનો પીછો કરતી વખતે એડન માર્કરામ (91)એ જોરદાર ઇનિંગ રમી હતી. પાકિસ્તાની કેપ્ટન બાબર આઝમ તેના બોલર મોહમ્મદ નવાઝને સાદો બોલ ફેંકવા બદલ બૂમો પાડતો જોવા મળ્યો હતો.
‘બીજું કંઈ નથી આવતું શું…’
બાબરની બોડી લેંગ્વેજને જોતાં, એવું લાગતું હતું કે તે ઓવરની શરૂઆતથી જ લાઇનમાં ભૂલ કરવા બદલ નવાઝ પર બૂમો પાડી રહ્યો હતો, જે મેચની નિર્ણાયક ક્ષણ હતી. સોશિયલ મીડિયા પર ઘણી કોમેન્ટ્સ જોયા બાદ અને વીડિયોને ધ્યાનથી જોયા અને સાંભળ્યા બાદ અંદાજ લગાવી શકાય છે કે પાકિસ્તાની કેપ્ટને બૂમ પાડી- બીજું કંઈ નથી આવતું શું, માત્ર એક જ બોલ નાંખે છે.
તમને જણાવી દઈએ કે પાકિસ્તાને નેધરલેન્ડને હરાવીને જીત સાથે વર્લ્ડ કપની શરૂઆત કરી હતી. ત્યારબાદ શ્રીલંકાને હરાવ્યું. ભારતે તેને અમદાવાદમાં 1.25 લાખ દર્શકોની હાજરીમાં હરાવ્યું હતું. આ પછી પાકિસ્તાનને ઓસ્ટ્રેલિયા, અફઘાનિસ્તાન અને હવે દક્ષિણ આફ્રિકા સામે હારનો સામનો કરવો પડ્યો હતો.
