આ પાકિસ્તાની ક્રિકેટરે કહ્યું-‘આશા છે કે કોહલી તેના જન્મદિવસ પર તેની 49મી સદી ફટકારે..!’

ભારતીય ટીમનો સ્ટાર બેટ્સમેન વિરાટ કોહલી 5 નવેમ્બરે પોતાનો 35મો જન્મદિવસ ઊજવશે. ભારતીય ટીમ તે જ દિવસે કોલકાતાના ઈડન ગાર્ડન્સ ખાતે દક્ષિણ આફ્રિકા સામે તેની લીગ મેચ રમશે. પાકિસ્તાનના વિકેટકીપર બેટ્સમેન મોહમ્મદ રિઝવાને ઈચ્છા વ્યક્ત કરી છે કે કોહલીએ સદી ફટકારીને પોતાના જન્મદિવસને ખાસ બનાવવો જોઈએ. રિઝવાને કહ્યું કે તેને આશા છે કે વિરાટ કોહલી 5 નવેમ્બરે તેની ODI કરિયરની 49મી સદી ફટકારશે.

રિઝવાને શું કહ્યું?

બાંગ્લાદેશ સામેની મેચ પહેલા એક ખાનગી ચેનલ સાથે વાત કરતા રિઝવાને કહ્યું, “5 નવેમ્બરે કોહલીનો જન્મદિવસ છે એ જાણીને સારું લાગ્યું. હું તેમને જન્મદિવસની શુભેચ્છા પાઠવું છું. ભલે હું મારો જન્મદિવસ ઊજવતો નથી અને હું તેમાં માનતો નથી. હું વિરાટ કોહલીને અભિનંદન આપું છું. મને આશા છે કે તે તેમના જન્મદિવસ પર તેમની 49મી ODI સદી ફટકારે. હું પણ ઈચ્છું છું કે તેઓ આ વર્લ્ડ કપમાં તેમની 50મી ODI સદી ફટકારે.

બાબર આઝમે ન આપ્યો જવાબ 

પાકિસ્તાનના કેપ્ટન બાબર આઝમને પણ વિરાટ કોહલીના 35મા જન્મદિવસ વિશે પૂછવામાં આવ્યું હતું. પરંતુ તેણે આ અંગે કોઈ જવાબ આપ્યો ન હતો. તમને જણાવી દઈએ કે બાબર આઝમ વર્તમાન વર્લ્ડ કપમાં ખરાબ તબક્કામાંથી પસાર થઈ રહ્યો છે અને તેની ટીમનું પ્રદર્શન પણ સારું રહ્યું નથી. ભારતીય ટીમે તેની તમામ છ મેચ જીતી લીધી છે, જ્યારે પાકિસ્તાન સેમિફાઇનલની રેસમાંથી બહાર થઈ જવાનો ખતરો છે. પાકિસ્તાનને અંતિમ-4માં પહોંચવા માટે તેની બાકીની તમામ મેચો જીતવી પડશે અને નસીબની મદદની પણ જરૂર પડશે.