સુરતમાં એક ચોર ઉલમાંથી ચૂલમાં પડ્યો હોવાની ઘટના સામે આવી છે. શહેરના રાંદેર વિયર કમ કોઝવે વિસ્તારમાં પોકેટમારી કરતો ચોર લોકોના મારીથી બચવા નદીમાં કૂદી ગયો હતો. ત્યારબાદ નદીના કાદવમાં ફસાઈ ગયો હતો. નદીના બેટ ઉપર જઈને ફસાઈ જતાં બહાર કાઢવા માટે ફાયર વિભાગને બોલાવવી પડી. લોકોના મારથી બચવા ચોર પહેરેલો શર્ટ અને ચોરી કરેલું પોકેટ બંન્ને ફેંકી દઈને સીધો વિયર કમ કોઝવેમાં કૂદી પડ્યો હતો. બાદમાં તરીને તે નદીમાં બનેલા એક બેટ ઉપર પહોંચીને અટકી ગયો હતો.
ચોરીની ઘટના સર્જાતા રાંદેર ફાયર સ્ટેશનને કોલ મળ્યો હતો. તેથી ફાયરના જવાનોએ નદી પાસે પહોંચીને ચોરને બહાર કાઢ્યો હતો. ત્યારબાદ આ ચોરને પોલીસે ડિટેઇન કરી લીધો હતો. ચોર ફસાઈ જતાં સ્થાનિકોએ ફાયર કંટ્રોલ અને પોલીસ બન્નેને તેની જાણ કરી હતી. ફાયર સબ ઓફિસર વસંત સૂર્યવંશીએ જણાવ્યું હતું કે, બેટ ઉપર ફસાયેલો આ વ્યક્તિ ખૂબ ડરી ગયો હતો અને ડરના માર્યે કશું પણ બોલી શકતો ન હતો, ત્યારબાદ આ યુવકને પોલીસને સોંપી દેવામાં આવ્યો હતો. પોલીસે આગળની કાર્યવાહી હાથ ઘરી છે.