મહેબૂબા મુફતીની પુત્રીની રાજકારણમાં એન્ટ્રી

જમ્મુ-કાશ્મીર વિધાનસભાની ચૂંટણીની તારીખ જાહેર થઈ ચૂકી છે, રાજકીય પક્ષો દ્વારા તૈયારીઓ શરૂ કરી દેવામાં આવી છે. આ દરમિયાન પીપલ્સ ડેમોક્રેટિક પાર્ટી (PDP)એ આઠ ઉમેદવારોના નામની પહેલી યાદી જાહેર કરી છે જેમાં પીડીપીના વડાં મહેબૂબા મુફ્તીની પુત્રી ઈલ્તિજા મુફ્તી સહિત આઠ ઉમેદવારોના નામ જાહેર કર્યા છે.
આ વખતે પીડીપી વડાં મહેબૂબા મુફ્તીના સ્થાને તેમની પુત્રી ઇલ્તિજા મુફ્તી ચૂંટણી લડી છે. ઇલ્તિજા મુફ્તી બિજબિહારા વિધાનસભા બેઠક પરથી ચૂંટણી લડશે. મહેબૂબા મુફ્તીએ આ સીટ પરથી 1996માં પહેલીવાર વિધાનસભા ચૂંટણી લડી હતી. સૂત્રોના જણાવ્યાનુસાર, આ પગલું મહેબૂબા મુફ્તી દ્વારા તેમની પુત્રીને રાજકીય વારસો સોંપવાની દિશામાં પહેલું પગલું છે.
ઉલ્લેખનીય છે કે, જમ્મુ-કાશ્મીર વિધાનસભાની ચૂંટણી ત્રણ તબક્કામાં ચૂંટણી યોજાશે. પહેલા તબક્કાનું મતદાન 18મી સપ્ટેમ્બર, બીજા તબક્કાનું મતદાન 25મી સપ્ટેમ્બર અને ત્રીજા તબક્કાનું મતદાન પહેલી ઑક્ટોબરે થશે. પરિણામ ચોથી ઑક્ટોબરે જાહેર થશે.