જમ્મુ-કાશ્મીર વિધાનસભા ચૂંટણીના છેલ્લા અને ત્રીજા તબક્કાનું મતદાન મંગળવારે સવારે 7 વાગ્યાથી શરૂ થઈ ગયું છે. સાંજે 6 વાગ્યા સુધી 7 જિલ્લાની 40 વિધાનસભા બેઠકો પર મતદાન થશે. જેમાં 39.18 લાખ મતદારોનો સમાવેશ થશે.ત્રીજા તબક્કાની 40 બેઠકોમાંથી 24 જમ્મુ વિભાગની અને 16 કાશ્મીર ખીણની છે. ચૂંટણી પંચના જણાવ્યા અનુસાર છેલ્લા તબક્કામાં 415 ઉમેદવારો મેદાનમાં છે. જેમાં 387 પુરુષ અને 28 મહિલા ઉમેદવારો છે.
ત્રીજા તબક્કામાં 169 ઉમેદવારો કરોડપતિ છે અને 67 ઉમેદવારો સામે ફોજદારી કેસ નોંધાયેલા છે. જમ્મુના નગરોટાથી ભાજપના ઉમેદવાર દેવેન્દ્ર સિંહ રાણા પાસે સૌથી વધુ 126 કરોડ રૂપિયાની સંપત્તિ છે.આ તબક્કામાં સંસદ હુમલાના માસ્ટરમાઇન્ડ અફઝલ ગુરુના મોટા ભાઈ એજાઝ અહેમદ ગુરુ પણ ચૂંટણી મેદાનમાં છે. એજાઝ ગુરુ સોપોર બેઠક પરથી અપક્ષ ઉમેદવાર છે.એન્જિનિયર રાશિદના ભાઈ ખુર્શીદ અહેમદ શેખ ઉત્તર કાશ્મીરની લંગેટ બેઠક પરથી ચૂંટણી લડી રહ્યા છે. પૂર્વ નાયબ મુખ્યમંત્રી મુઝફ્ફર હુસૈન બેગ બારામુલાથી અપક્ષ ઉમેદવાર તરીકે ચૂંટણી લડી રહ્યા છે.
પ્રથમ તબક્કાની 24 વિધાનસભા સીટો પર 18 સપ્ટેમ્બરે મતદાન થયું હતું. આ દરમિયાન 61.38% મતદાન થયું હતું. જ્યારે 25 સપ્ટેમ્બરે 6 જિલ્લાની 26 વિધાનસભા બેઠકો પર 57.31% મતદાન થયું હતું.
