એન્ફોર્સમેન્ટ ડિરેક્ટોરેટ (ED) નાગપુરે રૂપિયા 4,037 કરોડના બેંક ફ્રોડ કેસમાં 5 રાજ્યોમાં કાર્યવાહી કરી છે. એજન્સીએ મહારાષ્ટ્ર, પશ્ચિમ બંગાળ, બિહાર, ઝારખંડ અને આંધ્રપ્રદેશમાં રૂ. 503.16 કરોડની મિલકતો જપ્ત કરી છે. આ મિલકતો 24 ઓક્ટોબરે જપ્ત કરવામાં આવી હતી. આ સાથે કુલ જપ્ત સંપત્તિ અંદાજે 727 કરોડ રૂપિયા સુધી પહોંચી ગઈ છે.
આ કેસ કોર્પોરેટ પાવર લિમિટેડ અને તેમના પ્રમોટર્સ, ડિરેક્ટર મનોજ જયસ્વાલ, અભિજીત જયસ્વાલ, અભિષેક જયસ્વાલ વિરુદ્ધ મની લોન્ડરિંગના આરોપમાં તપાસ સાથે સંબંધિત છે. અટેચ કરેલી સંપત્તિઓમાં બેંક બેલેન્સ, મ્યુચ્યુઅલ ફંડ, શેર, કોર્પોરેટ પાવર લિમિટેડ અને મનોજ કુમાર જયસ્વાલ અને તેમના પરિવારના સભ્યો અને કેટલીક શેલ કંપનીઓના નામે રહેલી મિલકતોનો સમાવેશ થાય છે.
યુનિયન બેંક ઓફ ઈન્ડિયાએ આ મામલે ફરિયાદ નોંધાવી હતી. યુનિયન બેંકના જણાવ્યા અનુસાર, આરોપીઓએ લોન લેવા માટે પ્રોજેક્ટની વિગતો સાથે છેડછાડ કરી અને પછી બેંકના ભંડોળને ડાયવર્ટ કર્યું. આના કારણે બેંકને 4,037 કરોડ રૂપિયાનું નુકસાન થયું છે, જેમાં 11,379 કરોડ રૂપિયાનું વ્યાજ પણ સામેલ છે. આ કેસમાં અગાઉ EDએ નાગપુર, કોલકાતા અને વિશાખાપટ્ટનમમાં ઘણી જગ્યાએ સર્ચ ઓપરેશન હાથ ધર્યું હતું અને વાંધાજનક દસ્તાવેજો જપ્ત કર્યા હતા. EDએ ગુનાની રકમ પણ જપ્ત કરી હતી. જેમાં લિસ્ટેડ શેર અને સિક્યોરિટીઝ, મ્યુચ્યુઅલ ફંડ, ફિક્સ્ડ ડિપોઝિટ અને રૂ. 223.33 કરોડના બેંક બેલેન્સનો સમાવેશ થાય છે. આ ઉપરાંત 55.85 લાખની રોકડ પણ જપ્ત કરવામાં આવી હતી.
EDની તપાસમાં ખુલાસો થયો હતો કે CPL સિવાય અભિજીત ગ્રૂપની અન્ય સંસ્થાઓએ પણ આવી બેંક લોન છેતરપિંડી કરી હતી. આ જૂથે 250થી વધુ શેલ એન્ટિટીનું વેબ બનાવ્યું હતું જેનો ઉપયોગ ગુનાની આવકને એકત્રિત કરવા અને તેનો ઉપયોગ કરવા માટે કરવામાં આવતો હતો.
