ગુરુવારે ગૃહમંત્રી અમિત શાહના ઘરે મોડી રાત સુધી મહારાષ્ટ્રના મુખ્યમંત્રીને લઈને બેઠક ચાલી હતી. લગભગ અઢી કલાક ચાલેલી બેઠકમાં કેબિનેટ વિભાગની પણ ચર્ચા થઈ હતી. બેઠક બાદ એકનાથ શિંદેએ કહ્યું- બેઠક સકારાત્મક રહી. અમે અમિત શાહ અને જેપી નડ્ડા સાથે ચર્ચા કરી. આ પહેલી મુલાકાત હતી. મહાયુતિની વધુ એક બેઠક મુંબઈમાં યોજાશે. તેમાં સીએમ અંગે નિર્ણય લેવામાં આવશે.
સૂત્રોના જણાવ્યા અનુસાર 1 ડિસેમ્બરે ભાજપના બે નિરીક્ષકો પણ મુંબઈ જશે. તેઓ ધારાસભ્ય દળની બેઠકમાં હાજરી આપશે અને મુખ્યમંત્રીના નામની જાહેરાત કરશે. જો કે ભાજપ મરાઠા નેતાઓ પર પણ વિચાર કરી રહી છે.
બેઠક બાદ અજિત પવાર અને ફડણવીસ મુંબઈ જવા રવાના થયા, જ્યારે શિંદે તેમના પુત્ર શ્રીકાંતના ઘરે પહોંચ્યા અને સાંસદો સાથે બેઠક કરી. મોડી રાત્રે તે પણ મુંબઈ પરત ફર્યા હતા. મહાગઠબંધનના નેતાઓની બેઠક પહેલા શાહ અને શિંદેએ લગભગ અડધો કલાક સુધી ખાનગીમાં ચર્ચા કરી હતી. તે જ સમયે અમિત શાહના ઘરે પહોંચતા પહેલા ફડણવીસ અને અજિત પવાર વચ્ચે બેઠક પણ થઈ હતી.
એવું માનવામાં આવે છે કે, સીએમની પસંદગીમાં જાતિ અંકગણિત મોટી ભૂમિકા ભજવી શકે છે, કારણ કે 288 સીટોવાળી વિધાનસભામાં મોટી સંખ્યામાં મરાઠા સમુદાયના ધારાસભ્યો છે. દેવેન્દ્ર ફડણવીસ બ્રાહ્મણ છે. આવી સ્થિતિમાં બીજેપી નેતૃત્વ પણ કેટલાક મરાઠા નેતાઓને સીએમ માટે વિચારી રહી છે. જો કે સૂત્રોનું માનીએ તો જો RSS દબાણ વધારશે તો ફડણવીસના સીએમ બનવાની શક્યતાઓ વધારે છે. તે જ સમયે, કાર્યકારી મુખ્ય પ્રધાન એકનાથ શિંદેએ પહેલેથી જ સ્પષ્ટતા કરી છે કે તેમણે પીએમ નરેન્દ્ર મોદી અને કેન્દ્રીય ગૃહ પ્રધાન અમિત શાહને કહ્યું છે કે, તેઓ મુખ્યમંત્રી પદ માટે ભાજપની પસંદગીને અનુસરશે. શિવસેના (શિંદે)ના ધારાસભ્ય અને પ્રવક્તા સંજય શિરસાટે કહ્યું, ‘નવી સરકારમાં કાર્યકારી સીએમ ડેપ્યુટી સીએમનું પદ સ્વીકારશે નહીં. મુખ્યમંત્રી તરીકે રહી ચૂકેલા વ્યક્તિને આ શોભતું નથી.
શિંદેની આગેવાની હેઠળની શિવસેના ડેપ્યુટી સીએમ પદ માટે અન્ય નેતાને નોમિનેટ કરશે, એમ તેમણે જણાવ્યું હતું. શિંદેના સાંસદ પુત્ર શ્રીકાંત શિંદેએ કહ્યું કે મારા પિતાએ તેમની અંગત મહત્વાકાંક્ષાઓને બાજુ પર રાખીને ‘ગઠબંધન ધર્મ’નું ઉદાહરણ સ્થાપિત કર્યું છે.
