રાજકોટમાં BZ ગ્રુપ જેવું જ કૌભાંડ સામે આવતા સમગ્ર શહેરમાં ચકચાર મચી ગઈ છે. એક કા ડબલની સ્કિમમાં 8000 લોકો પાસે ક્રિપ્ટો કરન્સીમાં રોકાણ કરાવી 300 કરોડથી વધુની છેતરપિંડી આચરતા બ્લોક ઓરા નામની કંપનીના સંચાલકો વિરૂદ્ધ પોલીસ સ્ટેશનમાં અરજી કરવામાં આવી છે.
BZ ગ્રુપ દ્વારા 5 ટકાથી લઈ 25% સુધી વ્યાજ વળતર આપવાની સ્કીમથી કેટલાય લોકો ઠગાયા છે, ત્યારે રાજકોટમાં BZ ગ્રુપ જેવું જ બીજું કૌભાંડ સામે આવ્યું છે. એક કા ડબલની સ્કિમમાં હજારો લોકો છેતરાતા કૌભાંડ સામે આવ્યું છે. ક્રિપ્ટો કરન્સીમાં 8000 લોકો પાસે રોકાણ કરાવી છેતરપિંડી કરવામાં આવી હતી. જેમાં “બ્લોક ઓરા” નામની કંપનીના સંચાલકો વિરૂદ્ધ કોઠારીયા વિસ્તારમાં રહેતા વેપારી મોહસીન મુલતાનીએ ફરિયાદ નોંધાવી છે. પોલીસ કમિશનર, DGP તેમજ ગૃહ મંત્રીને પણ અરજી કરવામાં આવી છે.
300 કરોડથી વધુની છેતરપિંડીનું કૌભાંડની અરજીથી જ પોલીસે તપાસનો ધમધમાટ શરૂ કર્યો છે. છેતરપિંડી કરનારાએ અરજદારને મુંબઈ સહારા હોટલમાં મિટિંગ કરી વિશ્વાસમાં લીધા હતા. ત્યારબાદ ટી બેક નામની કોઇન કરન્સીમાં 4.5 લાખનું રોકાણ કરાવ્યું હતું. રોકડ રોકાણ કરાવી દરરોજ 1 ટકા વળતરની લાલચ આપી હતી. રોકાણકારાને 400 દિવસમાં રોકાણના ડબલ મળશે તેવી સ્કિમ બતાવી વિશ્વાસ જીત્યો હતો. તેમજ આ રોકાણ “બ્લોક ઓરા. કોમ” નામની વેબ સાઈટમાં જોઈ શકાશે તેવું જણાવ્યું હતું.
