યુક્રેન અને રશિયા વચ્ચે યુદ્ધવિરામ પર વાતચીતને લઈને અમેરિકાએ મોટું પગલું ભર્યું છે. યુએસ પ્રમુખ ડોનાલ્ડ ટ્રમ્પે પુષ્ટિ કરી હતી કે તેમના અધિકારીઓ રશિયા જઈ રહ્યા છે, જ્યાં 30 દિવસના યુદ્ધવિરામ પર ચર્ચા કરવામાં આવશે. આ પ્રસ્તાવને યુક્રેનનું સમર્થન છે અને તે યુદ્ધ સમાપ્ત કરવાની દિશામાં એક મહત્વપૂર્ણ પગલું હોવાની અપેક્ષા છે. આ દરમિયાન ટ્રમ્પે રશિયાને કડક શબ્દોમાં ચેતવણી પણ આપી હતી કે જો જરૂર પડી તો અમેરિકા તેની સામે ‘ખૂબ ખરાબ’ કરી શકે છે.
વ્હાઇટ હાઉસમાં આઇરિશ વડા પ્રધાન માઇકલ માર્ટિન સાથેની તેમની મુલાકાત દરમિયાન, ટ્રમ્પને યુક્રેન-રશિયા સંઘર્ષ અને સંભવિત યુદ્ધવિરામ પર પ્રશ્નો પૂછવામાં આવ્યા હતા. તેના જવાબમાં તેમણે કહ્યું કે અમેરિકન અધિકારીઓ હાલમાં રશિયાના પ્રવાસે છે અને ત્યાં શાંતિ મંત્રણાને આગળ લઈ જવાના પ્રયાસો થઈ રહ્યા છે. ટ્રમ્પે એમ પણ કહ્યું કે યુદ્ધના કારણે થયેલા વિનાશ અને નિર્દોષ લોકોના મોતને જોતા આ સંઘર્ષને જલદીથી ખતમ કરવો અત્યંત જરૂરી બની ગયો છે.
ટ્રમ્પે વધુમાં કહ્યું કે અમેરિકા પાસે રશિયાને આર્થિક રીતે નષ્ટ કરવાના ઘણા રસ્તા છે, પરંતુ તેઓ એવું કરવા નથી માંગતા કારણ કે તેમનો ઉદ્દેશ્ય શાંતિ સ્થાપિત કરવાનો છે. તેમણે સ્પષ્ટ કર્યું કે જો રશિયા વાતચીતનો માર્ગ નહીં અપનાવે તો અમેરિકા એવા પગલાં લઈ શકે છે જે તેના માટે ‘ખૂબ જ ખરાબ’ સાબિત થશે. આ દરમિયાન યુક્રેનના રાષ્ટ્રપતિ વોલોડીમિર ઝેલેન્સકીએ જેદ્દાહમાં અમેરિકા અને રશિયા વચ્ચેની વાતચીતને રચનાત્મક ગણાવી છે. તેમણે કહ્યું કે 30 દિવસના યુદ્ધવિરામનો ઉપયોગ સ્થાયી શાંતિ યોજનાના પાયાના નિર્માણની તક તરીકે થવો જોઈએ. ઝેલેન્સકીએ કહ્યું કે અમે આ યુદ્ધનો અંત લાવવા માંગીએ છીએ. દરેક વ્યક્તિએ એકસાથે આવીને રશિયાને શાંતિ સોદા માટે સંમત થવાની જરૂર પડશે. રશિયાએ હજુ સુધી કોઈપણ પ્રકારના યુદ્ધવિરામ માટે સ્પષ્ટ સંમતિ આપી નથી. રાષ્ટ્રપતિ વ્લાદિમીર પુતિને અગાઉ કહ્યું હતું કે રશિયા તેના હિતોની ખાતરી હશે તો જ શાંતિ કરાર સ્વીકારશે. જો કે, અમેરિકા અને યુક્રેન દ્વારા આ યુદ્ધવિરામને કોઈને કોઈ રીતે લાગુ કરવા માટે સતત પ્રયાસો કરવામાં આવી રહ્યા છે.
