સાયબર ફ્રોડના નાણાં પોતાના બેંક ખાતામાં જમા કરાવી કમિશન મેળવવાના હેતુથી એકાઉન્ટ ભાડે આપતા તત્વો સામે ભાવનગર સાયબર ક્રાઈમ પોલીસે લાલ આંખ કરી છે. સાયબર ફ્રોડની રકમ સગેવગે કરતા આવા મ્યુલ એકાઉન્ટ ધારકો શોધી કાઢી કડક કાર્યવાહી કરવા ભાવનગર રેન્જ પોલીસ મહાનિરીક્ષક આર.વી. અસારી, પોલીસ અધિક્ષક નિતેશ પાંડેય તેમજ મદદનીશ પોલીસ અધિક્ષક ઘનશ્યામ ગૌતમ દ્વારા ખાસ માર્ગદર્શન આપવામાં આવ્યું હતું.
આ સૂચનાના આધારે સાયબર ક્રાઈમ પોલીસ સ્ટેશનના ઇન્સ્પેક્ટર એમ.સી. ચૌધરી અને સબ ઇન્સ્પેક્ટર પી.એન. પરમારની ટીમે ‘સમન્વય પોર્ટલ’ના માધ્યમથી શંકાસ્પદ મ્યુલ એકાઉન્ટ્સ અને તેમાં થયેલા નાણાકીય વ્યવહારોની તપાસ હાથ ધરી હતી. આ સઘન તપાસ દરમિયાન એક એવું બેંક ખાતું મળી આવ્યું હતું જેમાં એક જ દિવસમાં મસમોટી રકમ જમા થઈ હતી. આ એકાઉન્ટની ઊંડાણપૂર્વક તપાસ કરતા દેશના જુદા જુદા રાજ્યોમાંથી કુલ ૦૮ જેટલી સાયબર ફ્રોડની એન.સી.સી.આર.પી. ફરિયાદો નોંધાઈ હોવાનું સામે આવ્યું હતું.
આ બાબતે સાયબર ક્રાઈમ પોલીસ સ્ટેશનમાં તા. ૦૭/૦૬/૨૦૨૬ના રોજ ભારતીય ન્યાય સંહિતા-૨૦૨૩ની સંબંધિત કલમો હેઠળ ગુનો રજીસ્ટર કરવામાં આવ્યો હતો. પોલીસે ટેકનિકલ સોર્સના આધારે ગણતરીના કલાકોમાં જ બેંક એકાઉન્ટ ધારક રાહુલ મનસુખભાઈ બોરીચા (ઉ.વ. ૩૨, રહે. ગોરધન કોલોની, મિલની ચાલી, ભાવનગર)ને ઝડપી પાડ્યો હતો. પકડાયેલા આરોપીના ખાતાની વધુ તપાસ કરતા ફરિયાદો સિવાય પણ અન્ય રૂ. ૪૯,૦૦,૦૦૦/- ની માતબર રકમ એક જ દિવસમાં ટ્રાન્સફર થઈ હોવાનો ખુલાસો થયો છે. હાલ પોલીસ આ નાણાંના સ્ત્રોત અંગે તપાસ ચલાવી રહી છે અને આ નેટવર્કના અન્ય આરોપીઓને પકડવા તજવીજ હાથ ધરી છે.
