નેશનલ ચેમ્પિયનશિપમાં ૨૦ મેડલ મેળવતા ભાવનગરના દિવ્યાંગ બાળકો

ગુજરાતમાં પ્રથમવાર ગુજરાત સીપી સ્પોર્ટ્સ ફેડરેશન ઓફ ગુજરાતના યજમાન પદે તા. 5,6 અને 7 જુન દરમિયાન અમદાવાદ ખાતે 13મી નેશનલ ચેમ્પિયનશિપ ૨૦૨૬ સ્પર્ધાઓ યોજાઇ હતી. સીપી અને ઓટિઝમના બાળકો માટેની પાંચ રમત સાથેની આ સ્પર્ધામાં દેશભરના 23 રાજ્યોએ ભાગ લીધો હતો. સ્થાનિક, પ્રાદેશિક અને રાજય કક્ષાએ ઉત્તમ દેખાવ કરી પસંદગી પામેલા બાળકોની આ સ્પર્ધામાં ભાવનગરની પીએનઆર સોસાયટીની નટરાજ સીપી સ્કૂલ તેમજ વિભાગોમાંથી 14 બાળકો (સી પી, ઑટીઝમ ખેલાડીઓ)એ ભાગ લીધો હતો.
સ્કેટીગ, ફુટબોલ, સ્વિમિંગ, બેડમિન્ટન અને સાયકલિંગની સ્પર્ધામાં ભાવનગરના આ દિવ્યાંગ બાળકોએ દેશભરના સ્પર્ધકોને ટક્કર આપી ૬ ગોલ્ડ, ૧૨ સિલ્વર અને ૨ બ્રોન્ઝ મેડલ સાથે ૨૦ મેડલ મેળવ્યા છે. આ સ્પર્ધામાં બાળકોને પ્રોત્સાહિત કરવા પીએનઆર સોસાયટીના સેક્રેટરી જનરલ પારસભાઈ શાહ, આસિસ્ટન્ટ સીઈઓ જયેશભાઈ દવે ત્રણેય દિવસ ખાસ ઉપસ્થિત રહ્યા હતા. ઉલ્લેખનીય છેકે, નટરાજ સી પી સ્કૂલના આચાર્ય જીજ્ઞાબેન સોલંકીના માર્ગદર્શન નીચે કાર્તિકભાઇ વ્યાસ, સ્પેશિયલ એજ્યુકેટર કોચ તેમજ હરદેવભાઇ જાદવ એસ્કોર્ટ દ્વારા આ બાળકોને માર્ગદર્શન અને તાલીમ આપવામાં આવી હતી. ગત વર્ષ દરમિયાન પણ સીપી, ઓટિઝમ અને મલ્ટી ડિસઓર્ડર ધરાવતા બાળકોએ ખેલ મહાકુંભ અને પટના ખાતે આયોજીત રાષ્ટ્રીય સ્પર્ધામાં શ્રેષ્ઠ દેખાવ કર્યો હતો.
નટરાજ સીપી સ્કૂલ બને છે સર્વાંગી વિકાસનું કેન્દ્ર
સી. પી. કે ઓટીઝમ ધરાવતા બાળકો માટે પરંપરાગત શિક્ષણ ઉપરાંત રમતગમત, સંગીત, ચિત્રકલામાં તૈયાર કરવા જરૂરી છે. રસરૂચિ પ્રમાણે આ ક્ષેત્રમાં આ બાળકો આગળ વધી અભિરુચિ મુજબ કારકિર્દી પણ બનાવતા હોય છે. પીએનઆર સોસાયટીની નટરાજ સ્કૂલમાં શિક્ષણ, સારવાર અને કૌશલ્ય તાલીમ માટે એક છત્ર હેઠળ બિન નિવાસી અને નિવાસી સુવિધા ઉપલબ્ધ છે. અહીં ભાવનગર જ નહીં આજુબાજુના જિલ્લાના બાળકો પણ શિક્ષણ, સારવાર અને કૌશલ્ય મેળવી રહ્યા છે. આવા બાળકોના વૈજ્ઞાનિક રીતે વિકાસ માટે નટરાજ સી પી સ્કૂલ (સરદાર પટેલ સ્કૂલની બાજુમાં કાળિયાબીડ ભાવનગર) ખાતે સોમથી શુક્ર સવારે ૧૧થી બપોરે ૪માં સંપર્ક સાધી શકાય છે.