ભાવનગર પેરોલ ફર્લો સ્કવોડના પોલીસ સ્ટાફના માણસો નાસતા-ફરતા આરોપીઓને શોધવા પ્રયત્નશીલ હતા. તે દરમિયાન સ્ટાફને ચોક્કસ બાતમી મળી હતી કે, ગારીયાધાર પોલીસ સ્ટેશનમાં નોંધાયેલા ઇંગ્લિશ દારૂના ગુનામાં નાસતો-ફરતો આરોપી મધુભાઇ હાથીભાઇ ગોવાળીયા (ઉંમર ૪૦, ધંધો ખેતી, રહે. રાયપર ગામ, તા. ગઢડા, જી. બોટાદ) ભાવનગર શહેરના ગંગાજળીયા તળાવ સીટી બસ સ્ટેશન પાસે જાહેર રોડ પર ઊભો છે. આ બાતમીના આધારે પોલીસે તાત્કાલિક દરોડો પાડી આરોપીને રંગેહાથ ઝડપી લીધો હતો. પકડાયેલા આરોપી વિરુદ્ધ કાયદેસરની કાર્યવાહી હાથ ધરીને તેને આગળની તપાસ અર્થે ગંગાજળીયા પોલીસ સ્ટેશન સોંપી આપવામાં આવ્યો છે.
