સાયબર ક્રાઇમ પોલીસ સ્ટેશનના પોલીસ સબ ઇન્સ્પેકટર ડી.એમ. ગોહીલે એક મોટી છેતરપિંડી અંગે સત્તાવાર ફરિયાદ નોંધાવી છે. પોલીસ તપાસ અને ‘સમન્વય પોર્ટલ’ પરથી મળેલા ડેટાના આધારે ભાવનગર જિલ્લાના એક શખ્સનું ‘મ્યુલ બેંક એકાઉન્ટ’ (સાયબર ગુનાના નાણાં ફેરવવાનું ખાતું) ઝડપાયું છે. જેમાં દેશભરમાંથી સાયબર ફ્રોડ કરીને મેળવેલા નાણાં જમા કરાવવામાં આવ્યા હતા.
સાયબર ક્રાઇમની તપાસ દરમિયાન સામે આવ્યું છે કે સ્ટેટ બેંક ઓફ ઇન્ડિયાના ખાતા નંબર 38101023772 માં દેશના અલગ-અલગ રાજ્યોમાંથી સાયબર છેતરપિંડીની કુલ બે અરજીઓ અંતર્ગત અનુક્રમે રૂ. ૧,૮૦,૦૦૦ અને રૂ. ૧,૬૮,૦૦૦ મળી કુલ રૂ. ૩,૪૮,૦૦૦ પ્રથમ લેયરમાં જમા થયા હતા. આ રકમ જમા થયાના જ દિવસે આરોપીએ ચેક મારફતે રૂ.૩,૯૦,૦૦૦ અને રૂ. ૬,૫૦,૦૦૦ મળી કુલ રૂ. ૧૦,૪૦,૦૦૦/- ઉપાડીને સગેવગે કરી દીધા હતા.
આ બેંક ખાતું તળાજાના કાજીવાડ, દેવડી ચોક ખાતે રહેતા ૨૮ વર્ષીય વેપારી મુસ્તફા મહેબુબભાઈ કુરેશીનું હોવાનું ખુલ્યું છે. આરોપીએ આર્થિક લાભ મેળવવા પોતાના ખાતાનો દુરુપયોગ કરવા દઈ ગુનાહિત કૃત્ય આચર્યું છે. આથી સાયબર પોલીસે આરોપી મુસ્તફા કુરેશી વિરૂદ્ધ ભારતીય ન્યાય સંહિતા -૨૦૨૩ ની કલમ ૩૧૭(૪) મુજબ ગુનો નોંધી આગળની કાયદેસરની કાર્યવાહી હાથ ધરી છે. આ કેસમાં સાયબર સ્ટાફ અને દેશભરના ભોગ બનનાર વ્યક્તિઓને સાક્ષી બનાવવામાં આવ્યા છે.
