ભાવનગર રેન્જ આઈ.જી. રાજેન્દ્ર વી. અસારી અને જિલ્લા પોલીસ અધિક્ષક નિતેશ પાંડેયની સૂચનાથી, પોલીસ સબ ઇન્સ્પેક્ટર જે. એન. ગોહિલના માર્ગદર્શન હેઠળ ‘નેત્રમ’ (VISWAS પ્રોજેક્ટ) ટીમ દ્વારા ટેકનોલોજીનો ઉત્કૃષ્ટ ઉપયોગ કરી એક અરજદારને ન્યાય અપાવવામાં આવ્યો છે.
તાજેતરમાં ગાયત્રી પ્રોવિઝન સ્ટોરના માલિકે નેત્રમ ખાતે અરજી કરી હતી કે, એક અજાણ્યો ગ્રાહક તેમની દુકાનેથી ₹૨૭૦૦ની ખરીદી કરી, ભૂલથી ચૂકવણું કર્યા વિના જતો રહ્યો છે. આ મામલે નેત્રમ સી.સી.આર ઈન્ચાર્જ હેડ કોન્સ્ટેબલ પી. પી. ધોળકીયા અને સ્ટાફે તાત્કાલિક કાર્યવાહી હાથ ધરી હતી.
બનાવ સ્થળ નજીકના સી.સી.ટી.વી. કેમેરા તપાસતા, લખુભા હોલ જંક્શન પાસે એક ફોર-વ્હીલર ગાડી નંબર: GJ04FA4511 શંકાસ્પદ સમયગાળા દરમિયાન પસાર થતી જોવા મળી હતી. આ વાહન નંબરના આધારે પોલીસે ખરીદી કરનાર વ્યક્તિનો સંપર્ક કર્યો હતો. પોલીસની મધ્યસ્થી બાદ, સદર ઇસમે પોતાની ભૂલ સ્વીકારી વેપારીને રૂ૨૭૦૦ પૂરેપૂરા પરત કર્યા હતા. આમ, ભાવનગર પોલીસે ટેકનોલોજીના સચોટ ઉપયોગથી ગણતરીના કલાકોમાં અરજદારની સમસ્યાનું સુખદ નિવારણ લાવ્યું છે.
