સ્ટેટ જીએસટી વિભાગ દ્વારા ભાવનગરમાં કરચોરો સામે સપાટો બોલાવવામાં આવ્યો છે. શહેરની જાણીતી કમ્પ્યુટર ક્લાસિસ સંસ્થા ‘કોસમોસ ઇન્સ્ટિટ્યૂટ’ ના જુદા-જુદા પાંચ સ્થળો પર શનિવારથી શરૂ થયેલી તપાસ સતત ચાર દિવસ સુધી ચાલી હતી. આ સઘન સર્ચ ઓપરેશનના અંતે સંસ્થા સામે ટેક્સ, વ્યાજ અને પેનલ્ટી સહિત કુલ રૂ. ૧.૫ કરોડની જવાબદારી ઊભી કરવામાં આવી છે.
મળતી માહિતી મુજબ, સીસીસી, ટેલી, સ્પોકન ઇંગ્લિશ અને વેબ ડિઝાઇનિંગ જેવા કોર્સ ચલાવતી આ સંસ્થા સર્વિસ સેક્ટરમાં આવે છે. નિયમ મુજબ તેનું વાર્ષિક ટર્નઓવર રૂ. ૫૦ લાખથી વધુ હોવા છતાં, કાગળ પર ઓછું દર્શાવીને ‘કંપોઝિટ સ્કીમ’ની શરતોનો ભંગ કરવામાં આવતો હતો. જીએસટી વિભાગની પાંચ ટીમોએ સંસ્થાની હેડ ઓફિસ અને ચાર બ્રાંચના હિસાબી ચોપડા તેમજ સાહિત્યની ઝીણવટભરી તપાસ કરી હતી. જેમાં રૂ ૭૨ લાખનો વેરો અને વ્યાજ-પેનલ્ટી મળીને કુલ રૂ.૧.૫ કરોડની કરચોરી પકડી પાડી કાયદેસરની કાર્યવાહી હાથ ધરાઈ છે.
૧૨૮ કરોડના બોગસ બિલિંગમાં ભાવનગર રડારમાં
ગત ૧૬ જૂનના રોજ સ્ટેટ જીએસટી વિભાગે ગુજરાતના વિવિધ શહેરો સહિત ભાવનગરની પેઢીઓમાં પણ દરોડા પાડ્યા હતા. આ દેશવ્યાપી તપાસમાં કુલ રૂ. ૧૨૮ કરોડનું બોગસ બિલિંગ કૌભાંડ આચરવામાં આવ્યું હોવાનું ખૂલ્યું છે.અસ્તિત્વ ન ધરાવતી પેઢીઓ ઊભી કરી રૂ ૨૩.૦૮ કરોડની ખોટી આઇટીસી (Input Tax Credit) મેળવવા બદલ જામનગરના પિતા-પુત્રની ધરપકડ થઈ ચૂકી છે. આ કૌભાંડના તાર ભાવનગર સાથે જોડાયેલા હોવાથી, આગામી દિવસોમાં સ્થાનિક સ્તરે મોટા પાયે ગેરરીતિઓ બહાર આવે અને કડક કાર્યવાહી થાય તેવા મજબૂત એંધાણ વર્તાઈ રહ્યા છે.
