ભાવનગર જિલ્લામાં ‘પ્રગતિનો પ્રવેશોત્સવ’ની થીમ સાથે યોજાયેલા ૨૪મા શાળા પ્રવેશોત્સવ અને કન્યા કેળવણી મહોત્સવની ભારે ઉત્સાહભેર પૂર્ણાહુતિ થઈ છે. તા. ૨૩ થી ૨૫ જૂન દરમિયાન ચાલેલા આ ત્રણ દિવસીય મહાઅભિયાનમાં જિલ્લાના કુલ ૫૨,૫૪૬ વિદ્યાર્થીઓએ શાળામાં પ્રવેશ મેળવી શિક્ષણયાત્રાના શ્રીગણેશ કર્યા છે. આ ઉપરાંત, જિલ્લાની આંગણવાડીઓમાં પણ ૧૧,૧૬૧ બાળકોને પ્રવેશાવાયા હતા.
વર્ગવાર વિગતો મુજબ, જિલ્લામાં બાલવાટિકામાં ૧૬,૬૫૦, ધોરણ-૧માં ૧,૧૭૬, ધોરણ-૯માં ૧૬,૧૮૧ તથા ધોરણ-૧૧માં ૭,૩૭૮ વિદ્યાર્થીઓએ નવો પ્રવેશ મેળવ્યો છે. તાલુકાવાર પ્રવેશની સ્થિતિમાં મહુવા, તળાજા અને પાલીતાણા તાલુકા અગ્રેસર રહ્યા હતા.
આ શૈક્ષણિક ઝુંબેશ દરમિયાન કન્યા શિક્ષણને પ્રોત્સાહન આપવા માટે ૨૨૯ દીકરીઓને વિદ્યાલક્ષ્મી બોન્ડનું વિતરણ કરવામાં આવ્યું હતું. શાળાએ આવેલા મંત્રીઓ અને વરિષ્ઠ અધિકારીઓએ નવપ્રવેશિત બાળકોનું કુમકુમ તિલક અને શૈક્ષણિક કીટ આપીને ઉષ્માભર્યું સ્વાગત કર્યું હતું. આ લોકભાગીદારીના અભિયાન દ્વારા જિલ્લાના ૫૨ હજારથી વધુ બાળકોને શિક્ષણના મુખ્ય પ્રવાહ સાથે જોડવામાં મોટી સફળતા મળી છે.
