ભાવનગર જિલ્લાના ગારીયાધાર તાલુકાના ઠાંસા ગામના વતની અને લુવારા ગામે પ્રાથમિક શાળામાં શિક્ષક તરીકે ફરજ બજાવતા ગોવિંદભાઈ દાનાભાઈ ગળસર (ઉ.વ. ૪૧) ની ઇક્કો કારમાંથી ૮૮ હજારની કિંમતના ચાંદીના કડાની ચોરી થઈ હોવાની ફરિયાદ ગારીયાધાર પોલીસ મથકમાં નોંધાવતા પોલીસે અજાણ્યા શખ્સ વિરુદ્ધ ગુનો નોંધી તપાસ હાથ ધરી છે.
આ અંગે પોલીસ મથકેથી જાણવા મળ્યા મુજબ ગત તા. ૨૫/૦૫/૨૦૨૬ ના રોજ સવારે ગાડીમાં ખામી સર્જાતા ગોવિંદભાઈ બોનેટ ખોલી તપાસ કરી રહ્યા હતા. ત્યારે હાથમાં પહેરેલું ૪૦૦ ગ્રામનું ચાંદીનું કડું (અંદાજિત કિંમત રૂ. ૮૮,૦૦૦) કામમાં નડતરરૂપ લાગતાં તેમણે તે ગાડીના ડેશબોર્ડમાં મૂકી દીધું હતું.
ગાડી ચાલુ ન થતાં સવારે ૮:૩૦ વાગ્યે તેમણે પોતાની ઇક્કો ગાડી (GJ-04-DA-5503) ગારીયાધારના નવાગામ રોડ પર આવેલ ‘રાધે મોટર ગેરેજ’માં રીપેરીંગ માટે મૂકી હતી. સાંજે ૬ વાગ્યે ગાડી રીપેર થઈ ગયા બાદ ઘરે લાવીને ડેશબોર્ડમાં તપાસ કરતા કડું ગાયબ હતું.
કડું ચોરાયાની જાણ થતાં જ તેઓ ફરિયાદ કરવાના હતા, પરંતુ અચાનક તેમના માતા મેયબેનને છાતીમાં દુખાવો ઉપડતાં તેમને તાત્કાલિક અમદાવાદ હાર્ટના ઓપરેશન માટે લઈ જવા પડ્યા હતા.માતાની સારવાર પૂર્ણ થયા બાદ ગોવિંદભાઈએ ગારીયાધાર પોલીસ મથકે અજાણ્યા ચોર સામે ચોરીની વિધિવત ફરિયાદ નોંધાવી છે. પોલીસે હાલ આ મામલે ગુનો દાખલ કરી વધુ તપાસ હાથ ધરી છે.
