બોટાદ જિલ્લાના રાણપુર શહેર અને તાલુકામાં વીજચોરી ડામવા માટે PGVCLની વિવિધ ટીમો દ્વારા મેગા ચેકિંગ ડ્રાઇવ યોજવામાં આવી હતી. અચાનક પડેલા આ વ્યાપક દરોડાઓને પગલે સ્થાનિક વીજચોરોમાં ભારે ફફડાટ અને દોડધામ મચી ગઈ છે.
પીજીવીસીએલની વિભાગીય કચેરીઓના સંકલનથી આ મેગા ઓપરેશન પાર પાડવામાં આવ્યું હતું, જેમાં અમરેલી, સાવરકુંડલા, ધ્રાંગધ્રા, ગઢડા, સુરેન્દ્રનગર, બોટાદ, જાફરાબાદ, ઉના અને રાણપુરની PGVCL ટીમોએ સંયુક્ત રીતે ઓપરેશન હાથ ધર્યું હતું.અને રાણપુર શહેર ઉપરાંત તાલુકાના ઉમરાળા, રાજપરા, નાનીવાવડી અને ખસ સહિતના ગામોમાં સઘન તપાસ કરાઈ હતી.
ચેકિંગ દરમિયાન કુલ ૨૨૦ જેટલા વીજ કનેક્શન તપાસવામાં આવ્યા હતા.આ તપાસમાં ૫૪ કનેક્શનમાં સીધી વીજચોરી પકડાઈ હતી. આ તમામ ગ્રાહકોને કુલ રૂ. ૩૪ લાખનો દંડ ફટકારવામાં આવ્યો છે.બોટાદ જિલ્લા PGVCLના અધિક્ષક ઈજનેર કે.ડી. નીનામા અને રાણપુર કચેરીના ડેપ્યુટી ઈજનેર રત્ના ચૌધરીએ કડક શબ્દોમાં ચીમકી આપી છે કે, વીજચોરી કરી દેશને આર્થિક નુકસાન પહોંચાડનારા તત્વો પોતાની ગેરરીતિ તાત્કાલિક બંધ કરે.તેમણે સ્પષ્ટ કર્યું હતું કે આગામી દિવસોમાં પણ ગમે ત્યારે અચાનક ચેકિંગ હાથ ધરવામાં આવશે. જે કોઈ લોકો વીજચોરીમાં પકડાશે તેમને કોઈપણ સંજોગોમાં છોડવામાં નહીં આવે અને કડક દંડ વસૂલાશે. PGVCL ના ધાડેધાડા ઉતરતા અને લાખો રૂપિયાના દંડની કાર્યવાહીથી હાલ વીજચોરોમાં દહેશતનો માહોલ છે.
