અમારી સામે કેમ જુઓ છો? કહી ગાળો આપીને યુવાન ઉપર છરી વડે હુમલો

ભાવનગરના કરચલીયાપરા વિસ્તારમાં રહેતા અને મચ્છીનો વેપાર કરતા રાહુલભાઈ ઉર્ફે ટીટો જીતેશભાઇ બારૈયા (ઉ.વ.૧૯) ગત રાત્રે પોતાના મિત્રો રોહિત અને મોહિત સાથે બાઈક પર જતા હતા. આ દરમિયાન રાત્રે સાડા દસેક વાગ્યે હનુમાનનગર પાસે રાહુલ ઉર્ફે છોતેર મકવાણા, પ્રકાશ ઉર્ફે પકો મકવાણા અને ટીટો નામના શખ્સોએ તેઓને ઉભા રાખી “અમારી સામે કેમ જોવો છો” તેમ કહી ગાળો આપવાનું શરૂ કર્યું હતું.
રાહુલભાઈએ ગાળો બોલવાની ના પાડતા રાહુલ ઉર્ફે છોતેરે ઉશ્કેરાઈને પોતાની પાસે રહેલી છરી કાઢી તેમના ડાબા હાથના બાવડાના ભાગે મારી દીધી હતી. જ્યારે પ્રકાશ અને ટીટાએ તેમના મિત્ર રોહિતને પકડી લાફા અને ઢીકાપાટુનો માર માર્યો હતો. જતાં જતાં આરોપીઓએ “આ રસ્તે નીકળશો તો જાનથી મારી નાખીશું” તેવી ધમકી પણ આપી હતી. ઈજાગ્રસ્ત રાહુલભાઈને સર.ટી. હોસ્પિટલમાં સારવાર અર્થે ખસેડવામાં આવ્યા હતા જ્યાં તેમને ૮ ટાંકા લેવા પડ્યા હતા. આ મામલે ત્રણેય શખ્સો સામે બી.એન.એસ કલમ 118(1), 115(2), 352, 351(3), 54 તથા જીપીએ 135 મુજબ ગુનો નોંધી વધુ તપાસ હાથ ધરી છે.