ગારીયાધારમાંથી ચાંદીના કડાની ચોરી કરનારા ૩ શખ્સની ધરપકડ

ભાવનગર જિલ્લાના ગારીયાધારના ગેરેજમાં રિપેરીંગમાં ગયેલી ઈકો કારમાંથી બે માસ પૂર્વે ચાંદીના કડાની ચોરી થવા પામી હતી. જે મામલે પોલીસે ગુનો દાખલ કરી નવાગામના શખસની ધરપકડ કરી પુછપરછ કરતા તેના કાકાના દિકરાએ સોનીને કડુ વેચ્યાની કબુલાત આપી સોનીના કબજામાંથી કડુ કબજે લઈ ત્રણ શખસની ધરપકડ કરી લીધી હતી.
ગારીયાધારના નવાગામ રોડ પર આવેલ રાધે મોટર ગેરેજ ખાતે ઈક્કો ગાડી રીપેરીંગ કામ અર્થે મુકેલ હોય ત્યારે ડેશબોર્ડના ખાનામાં પોતાનું હાથમાં પહેરવાનુ ચાંદીનું કડુ અજાણ્યો ઈસમ આ કડુ ચોરી કરી નાસી ગયો હતો જે બાબતની ફરીયાદ ગારીયાધાર પોલીસ સ્ટેશનમાં દાખલ થતા પોલીસે તપાસ હાથ ધરી નરેશ ઉર્ફે નરશી બાલુભાઈ સરવૈયા, (ઉ. વ.૩૫), સુનીલ હરજીભાઈ સરવૈયા (ઉ.વ.૨૮ રહે. બન્ને. નવાગામ તા.ગારીયાધાર), અને ભાવેશ નટુભાઈ લોઢીયા (ઉ.વ ૩૯, રહે. ગંગાનગર, ગારીયાધાર)ની ધરપકડ કરી પુછપરછ કરતા શખસોએ ચાંદીના કડાની ચોરીની કબુલાત આપી આ બાબતે નરેશની યુક્તિ પ્રયુકિતથી ગહન પુછપરછ કરતા પોતે આ કડુ ચોરેલ હોવાનું કબૂલતો હોઈ અને હાલ આ કડુ ક્યા છે તે બાબતે પુછતા તેણે આ કડુ પોતાના કાકાના દિકરા સુનીલ હરજીભાઈ સરવૈયાને વેચવા માટે આપેલ હતુ અને આ સુનીલએ આ કડુ વેચીને રોકડ રૂપિયા ૬૦,૦૦૦ મને આપેલ અને રૂપિયા ૧૦,૦૦૦ સુનીલે રાખ્યા હોવાનું તેમજ આ કડુ ગારીયાધાર ખાતે આવેલમાં હિંગળાજ જવેલર્સ ધરાવતા ભાવેશ સોનીની દુકાને વેચેલ હોવાનું જણાવતા ભાવેશ સોનીની દુકાને જઈ આ બાબતે પુછપરછ કરતા પોતે આ કડુ ચોરીનો મુદામાલ હોવાનું જાણવા છતા પોતાની પાસે રાખેલ અને આ સુનીલભાઈને રૂપિયા ૭૦,૦૦૦ આપ્યા હોવાની કબુલાત આપી હતી. જેથી ત્રણેય આરોપીને ઝડપી આગળની કાયદેસરની કાર્યવાહી હાથ ધરી હતી.