મહુવા શહેરમાં સોની બજાર એસોસિએશન અને ભાવનગર લોકલ ક્રાઈમ બ્રાન્ચ (LCB)ના સંયુક્ત ઉપક્રમે સોની વેપારીઓ અને કારીગરો માટે કાયદાકીય જાગૃતિ અભિયાનનું આયોજન કરવામાં આવ્યું હતું. કાર્યક્રમ દરમિયાન ભાવનગર LCBના PSI વાઢેર તથા તેમની ટીમ દ્વારા વેપારીઓને દાગીના ખરીદી-વેચાણ દરમિયાન પાલન કરવાની કાયદાકીય જોગવાઈઓ અંગે વિસ્તૃત માહિતી આપવામાં આવી હતી.
અધિકારીઓએ વેપારીઓને ગ્રાહકો પાસેથી જૂના દાગીના ખરીદતી વખતે જરૂરી ઓળખ પુરાવા, બિલ તથા અન્ય દસ્તાવેજોની ચકાસણી કરવાની સલાહ આપી હતી. સાથે જ ચોરીના અથવા ગુનામાં સંડોવાયેલા દાગીના અજાણતા ખરીદાય તો તેની કાયદાકીય જવાબદારી અને કાર્યવાહી વિશે પણ માહિતગાર કરવામાં આવ્યા હતા.
આ ઉપરાંત આજકાલ વધી રહેલા ઓનલાઈન અને નાણાકીય ફોડ સહિત વિવિધ પ્રકારની છેતરપિંડીથી કેવી રીતે બચી શકાય તેમજ શંકાસ્પદ વ્યવહારો અંગે તાત્કાલિક પોલીસને જાણ કરવાની અપીલ પણ કરવામાં આવી હતી.આ કાર્યક્રમમાં સોની બજાર એસોસિએશનના પ્રમુખ ચેતનભાઈ સાગર, ભાવનગર LCBનો સ્ટાફ તેમજ મહુવાના મોટી સંખ્યામાં સોની વેપારીઓ અને કારીગરો ઉપસ્થિત રહ્યા હતા.
