મહુવા ગ્રામ્ય પોલીસ સ્ટેશનના સ્ટાફે ચોક્કસ બાતમીના આધારે દુધાળા નં.૧ ગામમાં દરોડો પાડીને ખુલ્લી જગ્યામાં જાહેરમાં તીનપત્તીનો જુગાર રમતા બે શખ્સોને રંગેહાથ ઝડપી પાડ્યા છે. પોલીસે રોકડ, મોબાઈલ અને વાહન સહિત કુલ રૂ. ૨૫,૫૯૦/- નો મુદ્દામાલ જપ્ત કરી જુગાર ધારા હેઠળ કાયદેસરની કાર્યવાહી હાથ ધરી છે.
પ્રાપ્ત વિગતો અનુસાર, ગતરાત્રીના મહુવા ગ્રામ્ય પોલીસ સ્ટેશનના સ્ટાફ નાઈટ પેટ્રોલીંગમાં હતા. તે દરમિયાન મધરાતે ૦૦:૦૫ વાગ્યે બાતમી મળી હતી કે દુધાળા નં.૦૧ ગામમાં મનુભાઇ જોળીયાની વાડીના શેઢે આવેલ ઝુંપડા નીચે કેટલાક શખ્સો લાઈટના અજવાળે ગંજીપાના વડે પૈસાની હારજીતનો જુગાર રમી રહ્યા છે. આ હકીકતના આધારે પોલીસે પંચોને સાથે રાખીને રાત્રે ૦૦:૨૦ વાગ્યે દરોડો પાડ્યો હતો.પોલીસની રેડ પડતા જ જુગારીઓમાં નાસભાગ મચી ગઈ હતી. પોલીસે કોર્ડન કરીને બે ઈસમોને ઝડપી લીધા હતા. પૂછપરછમાં તેમણે પોતાના નામ ચિરાગ ઉર્ફે ચીકણી જીતેન્દ્રભાઇ ગોહિલ ઉ.વ.૨૨, રહે. મગન કરશનના પુતળા પાસે, મહુવા અને મનોજભાઇ મગનભાઈ ભીલ ઉ.વ.૩૬, રહે. લાતી બજાર, મહુવા વાળો હોવાનું જણાવ્યું હતું. જ્યારે અન્ય કેટલાક ઈસમો અંધારાનો લાભ લઈ નાસી છૂટવામાં સફળ રહ્યા હતા.
પોલીસે ઝડપાયેલા બંને આરોપીઓ પાસેથી અને જુગારના પટમાંથી રોકડ રકમ: રૂ. ૨,૫૯૦/-, એક મોબાઈલ ફોન: રૂ.૩,૦૦૦/- તેમજ ૨૦,૦૦૦/- ની કિંમતનું લાલ કલરનું સુઝુકી એક્સેસ અને ગંજીપાના મળી કુલ રૂ. ૨૫,૫૯૦/- નો મુદ્દામાલ કબ્જે કર્યો છે. પકડાયેલા બંને શખ્સો વિરુદ્ધ જુગાર ધારા કલમ-૧૨ મુજબ ગુનો નોંધી, ફરાર થઈ ગયેલા અન્ય આરોપીઓને પકડવા પોલીસે આગળની તપાસ હાથ ધરી છે.
