ભાવનગરના પ્રજાવત્સલ અને આદરણીય રાજવી કૃષ્ણકુમારસિંહજી ગોહિલના ઐતિહાસિક યોગદાન સાથે જોડાયેલી એક અનોખી સફર આજે ભારતના આધુનિક સેમિકન્ડક્ટર મિશન સુધી પહોંચી છે. વર્ષ ૧૯૫૧માં ભાવનગરના મહારાજા જ્યારે મદ્રાસ રાજ્યના ગવર્નર તરીકે સેવા આપી રહ્યા હતા, ત્યારે તેમના હસ્તે મુરુગપ્પા ગ્રુપની ‘ટીઆઈ સાઈકલ્સ’ ફેક્ટરીનો શુભારંભ થયો હતો. જેમાંથી દેશની લોકપ્રિય ‘હર્ક્યૂલિસ’ સાયકલનું નિર્માણ શરૂ થયું હતું. સમય સાથે આગળ વધતાં, આ જ ગ્રુપની સબસિડરી કંપની ‘CG સેમિ’ દ્વારા ગુજરાતના સાણંદ ખાતે ₹૭૬૦૦ કરોડના ખર્ચે અત્યાધુનિક OSAT સુવિધા શરૂ કરવામાં આવી છે, જેનું ઉદ્ઘાટન વડાપ્રધાન નરેન્દ્ર મોદીના હસ્તે કરવામાં આવ્યું હતું. જાપાન અને થાઈલેન્ડની કંપનીઓના સહયોગથી સ્થપાયેલા આ પ્લાન્ટમાં બનેલી સેમિકન્ડક્ટર ચીપ્સ હવે દેશ-વિદેશમાં સપ્લાય કરવામાં આવશે.
આ ગૌરવપૂર્ણ સિદ્ધિની સાથે કંપનીએ મહિલા સશક્તિકરણનું ઉત્કૃષ્ટ ઉદાહરણ પૂરું પાડ્યું છે. પ્લાન્ટના ફેક્ટરી ફ્લોર પર મશીન ઓપરેશન્સ અને પ્લાન્ટ સંચાલનની મહત્તમ કામગીરી મહિલા કર્મચારીઓ સંભાળી રહી છે. સમગ્ર દેશના વિવિધ રાજ્યોમાંથી આવેલી આ મહિલાઓને સ્વતંત્ર રીતે કામગીરી સંભાળવા માટે કંપની દ્વારા મલેશિયા મોકલીને ત્રણ મહિનાની ખાસ પ્રેક્ટિકલ તાલીમ પણ આપવામાં આવી હતી.
અહીં કાર્યરત મહિલા એન્જિનિયરો ઉત્સાહભેર તેમની અનુભૂતિ શેર કરે છે. અમદાવાદની L.D. એન્જિનિયરિંગમાં અભ્યાસ કરનાર નવસારીની શ્રેયા પટેલ અને સુરેન્દ્રનગરની જાનવી પાટડીયા પ્રોસેસ ક્વોલિટી એન્જિનિયર તરીકે ફરજ બજાવે છે. શ્રેયા જણાવે છે કે ડિફેક્ટ શોધવાની અને ટેક્નિકલ બાબતો શીખવાની પ્રક્રિયા ખૂબ રોમાંચક છે. જ્યારે જાનવી અનુસાર સ્ક્રેચમાંથી આટલા મોટા પ્લાન્ટના નિર્માણમાં કામ કરવાનો અનુભવ નવું શીખવાની ધગશ પૂરી પાડે છે. કેરળની વૈષ્ણવી પાલ અને સાન્ડ્રા ઇ.કે. તેમજ ઇન્દોરની આકાંક્ષા તંવર પણ પ્રોસેસ એન્જિનિયર તરીકે સેવા આપી રહી છે. તેઓ જણાવે છે કે આ આંતરરાષ્ટ્રીય તાલીમ અને ગુજરાતના ઔદ્યોગિક વાતાવરણથી તેમનો આત્મવિશ્વાસ બુલંદ થયો છે. આમ, ભાવનગરના ઈતિહાસ સાથે જોડાયેલું આ ગ્રુપ આજે દેશના ટેકનોલોજીકલ ભવિષ્યને નવી ઊંચાઈઓ આપી રહ્યું છે.
